Greenland Venture pingasunik nutaanik allaffeqarfittaarniarpoq

Piginneqatigiiffik Greenland Venture, Maniitsumi allaffeqarfeqarnermi saniatigut, Ilulissani, Nuummi Qaqortumilu allaffittaarnialerpoq.

Greenland Venture-mi siulersuisuni siulittaasoq, Gerth B. Lynge, ullumi siusinnerusukkut aperaarput tuaviupiluttoqannginnersoq, taamaatoqannginerarpaalu.

-Taama pisoqarnisaa qangali eqqartortarsimavarput, tassa kommunit assigiinngitsut tikillugit allaffeqarsinnaaneq soqutiginartillugu, ineriartortitsinermilu naleqqunnerpaatut tamanna isigaarput, kommunerujussuanngulersullu taama inissiiffigereersinnaagutsigik, pisoqarfiusussallu qanimut taamaalilluta tikereerlugit, siulersuisut tamanna iluarinartissimavaa, Gerth B. Lynge oqarpoq, nangillunilu:

Suliffeqarfiit Greenland Venturip piginneqataaffii qaammatit kingulliit qulingiluat/qulit kingulliit marloriaat sinnerlugu amerlisimapput, massakkut 25-t missaaniillutik. Sukkavallaartumik pisoqarsorinngilaa, qinnuteqartummi tamarmik peqqissaartumik suliarineqartarmata. Sulisut marlunnik ilaneqarsinnaanerat Gerth B. Lynge-p aamma akuerineqarsimanerarpaa.

Gerth B. Lynge aperaarput pilersaarutiminnut aningaasassaqarnersut, akivorlu Maniitsumi novembarip ulluisa arfernani ataatsimiikkamik aningaasaqarneq oqaluuserigamikku paasinarsisimasoq allaffittaarnissamut aningaasassaqartoq. Atorfinitsitassamik imminnut inissaqartinneqarnissaat anguniakkanut aamma ilaanerarpaa, taamaalilluni atorfimmut atatillugu ineqartinneqartarnerup atorunnaarsinneqarnissaata piviusunngorsinnaanissaa Greenland Venture-mit anguneqaraluttualersoq oqarpoq.

Nunap immikkoortortaani allaffeqarfeqalernissamik suliniutit annersaat ukioq 2008-p affaata siulliup ingerlanerani naammassineqarnissaat Gerth B. Lynge-p naatsorsuutigaa.