Greenland Venture 2007-imi sinneqartoorpoq

- Angusat siulersuisut naammagaat, tassami Greenland Venture piginneqatigiilluni ingerlatsivinnik suliffeqarfinnillu aallartitseqataasarnermigut aningaasat annaariaannaat utaqqisinnaassuseqartullu aningaasaliissutigisarpai, siulersuisuni siulittaasoq Gerth Lynge nalunaarummini oqarpoq.

Greenland Venture A/S ukiumi 2007-mi pilesaarutinut qinnuteqaatinik 86-inik tigusaqarpoq ukiumi siuliani 40-t sinnilaaginnarsimallugit. Ukiumi 2007-mi aningaasaliinerit naleqarput 18.709.000 kr-nik, taamaalilluni suliffeqarfik suliffeqarfinnut 25-nut ukiup naanerani piginneqataalersimalluni.

Greenland Venturep sinneqartoorutai Pisiffimmi piginneqataassutinik aallaaveqarput, Greenland Venture-imi piginnittunit tapiissutinik pissarsisarunnaarnikuummat Pisiffiup sinneqartoorutai taamaalillutik iluaqutaasut, siulersuisoq nassuiaavoq.

Greenland Venture Maniitsumi allaffeqarfeqarpoq, Nuummili immikkoortortaqarluni naatsorsuutigaallu Qaqortumi Ilulissanilu aamma immikkoortortaarnissaq.

Inatsisartuni ilaasortaq Jørgen Wæver Johansen siorna ukioq aallartilaartoq pisortatut sulilerpoq.

Ippassaq ataatsimeersuarnermi Nuna Oil-ip pisortaa Hans Kristian Olsen siulersuisuni ilaasortanngortinneqarpoq. Siulersuisunit anivoq Nuna Mineralsip pisortaa Ole Christiansen, piffissaalatsini pillugu tunuartoq.

Gerth Lynge Greenland Venturep siulersuisuini siulittaasutut qinigaaqqippoq, tullersortaalu Ludvig Lyberth aamma ingerlaannarluni.