Greenland strongest: Taatsiaq Gabrielsenip rekordini qaangerpaa
Oqimaatsunik kivittaarisartut Nunatsinni imminnut unamminerat pissutaalluni kivinneqartartut oqimaaliartorput.
Tamanna ersarissumik takuneqarsinnaavoq nukittuneqqusaanneq Greenland strongest arfininngorneq novemberip arfernat pimmat.
AAMMA ATUARUK Juulunnguaq Vetterlain fra Ilulissat er Greenland Strongest
Taatsiaq Gabrielsenip Ilulissaneersup 105 kilo ataallugu oqimaassusilinni kivitseriaatsimi dødløftimi Nunatsinni rekordini 15 kilomik qaangerpaa. Siorna 360 kilo kivereerlugu maanna 375 kilomut pitsanngoriartippaa.
Taamaasilluni Taatsiaq Gabrielsenip Greenland strongestimi rekordiliisut pokaliat ingerlaartoq ukiup aappassaa tulleriinnik tiguaa.
Taamaattoq 105 kilo ataallugu oqimaassusillit unammineranni angusat katinneranni ajugaassutissatut tamanna naammanngilaq.
Misilittakkat iluaqutigai
Nikolaj Joensen Nuummeersoq katinneranni ajugaasuuvoq naak 320 kilo dødløftimi kivikkaluarlugu. Unammissutsinili allani pointit pissarsiai katinneqarmata ajugaavoq.
- Aatsaat unammeqataanngilanga unammeriaatsillu sisamaapput. Nalunngilara ajugaanissamut periarfissaqarlunga unammeriaatsini tamaginni unammilluarsinnaaguma, Nikolaj Joensen KNR-mut oqarpoq.
Unammeriaatsit sisamat tassaapput dødløft kalaallisut Kaassassummik taaneqartoq, log qajamik taaneqartoq, poorsuit 240 kilo qamutinik uniarlugit kiisalu poorsuit 140 kilo tuimut kivittarlugit.
105 kilo ataallugu oqimaassusillit
1. Nikolaj Joensen, Nuuk
2. Taatsiaq, Gabrielsen, Ilulissat
3. Bjørk Kristensen, Nuuk
4. Nukappi Vetterlain, Nuuk
5. Pavia Nielsen, Uummannaq
6. Michael Thorsen, Nuuk
Unammissutsit kingullersaanni katinneranni ajugaanini qulakkeerpaat tassani poorsuit 140 kilomik oqimaassusillit minutsip ataatsip ingerlanerani amerlanerpaamik kivinniuppaat.
Unammeriaaseq kingulleq sioqqullugu Taatsiaq Gabrielsen aamma Nikolaj Joensen pointitigut naligiipput.
- Unammeriaatsimut kingullermut sassarneq imaannanngilaq. Sapinngisamik pitsanerpaamik ingerlaniaannarpunga iluatsillugulu. Tamatta tassani ajugaanissamut periarfissaqarpugut, Nikolaj Joensen oqarpoq.
105 kilo ataallugu oqimaassusilinni Bjørk Lange Kristensen Nuummeersoq pingajuattut inissippoq.
Oqimaannerni openimik taaneqartartumi Juulunnguaq Vetterlain ajugaavoq Kim Ujarak Lorentzen nujaartoornermi kingorna uniinnarmat.
Ajoqusernerali qujanartumik annertunngilaq. Islandimi nukittuneqqusaannermi Magnus Magnusson Strongman-mi novemberip naanerani unammeqataassaaq.
