Greenland Minerals nunarput pillugu suliassamik aallartitsivoq
Australiamiut aatsitassarsiorfiutaata Greenland Mineralsip nunarput danskillu naalagaaffiat isumaqatigiissitsiniarnermik suliassamik aallartitsinissamik maanna kissaateqarfigilerpai.
Naalakkersuisut taama nalunaarput, taakkumi aatsitassarsiutileqatigiiffimmiit allakkamik maalaarummik tigusaqaqqammerput.
Naalakkersuisut paasissutissiinerat naapertorlugu, Greenland Mineralsip danskit isumaqaatigiissitsiniartarnikkut eqqartuussiviat aqqutigalugu Kuannersuarni uranimik qalluinissamik periarfissaq pinngitsaaliissutiginiarsarilerpaat, naak aamma aatsitassarsiornermut tunngasut 2010-mili nunatsinniit akisussaaffigineqaraluartut.
Periuseq tamanna sanngorliorneruvoq Naalakkersuisunut kamaammertitsisoq, tusagassiutini allakkiami ualimut nassiunneqartumi ilaatigut taama allassimasoqarpoq.
Naalakkersuisoq: Pakatsivunga
Naalakkersuisullu naapertorlugit Greenland Mineralsip tungaaniit Kuannersuarni Uranimik qallueriaraluartoqarpoq, naak nalunngikkaluarlugu tamanna pisinnaanngitsoq.
Tassami Naalakkersuisut Inatsisartullu siorna novembarimi nunatsinni uranimik qalluisoqannginnissaa isumaqatigiissutigaat.
- Greenland Mineralsip maalaaruteqarluni allagaa, inatsiseqarnikkut toqqammaveqarnanilu inuiaqatigiitsinnut tamallu oqartussaaqataanerannik sakkortuumik tatiginninnginnermik takutitsisoq pakatsissutigaara, Aningaasaqarnermut, Aatsitassanut, Inatsisit Atuutsinneranut Naligiissitaanermullu Naalakkersuisoq Naaja Nathanielsen tusagassiutinut nalunaarummi taama issuarneqarpoq.
Isumaqatigiissitsiniarnermik suliaq inuinnaat akornanni eqqartuussinermut assinguvoq, tassanilu isumaqatigiinngissutit oqartussaasut eqqartuussivii avaqqullugit aalajangiivigineqartarput.
Isumaqatigiissitsiniartarnermik eqqartuussiviup aalajangiinera pinngitsoornani malinneqartussaavoq ingerlateqqinneqarsinnaananilu.
- Naalakkersuisut maalaarut pimoorullugu suliarissavaat, peqatigisaanillu nunatsinnut innuttaanullu tamanut iluaqutaasumik aatsitassanik ingerlatsineq mingutsitsinngitsunillu ingerlatsisoqarnissaanik ineriartortinnermik suliaqarnerput nangissavarput.” Aningaasaqarnermut, Aatsitassanut, Inatsisit atuutsinnerannut Naligiissitaanermullu Naalakkersuisoq Naaja H. Nathanielsen oqarpoq.
