Greenland Minerals misissuinermut 145 millionit koruuninik aningaasartuuteqartoq
Greenland Mineralsip Kuannersuarni aatsitassanik misissuinerminut 145 millionit koruunit aningaasartuutigai.
Aatsitassarsiutileqatigiiffiup taakku 2016-imit 2020-mut aningaasartuutigai.
Aatsitassanut naalakkersuisoq, Naaja Nathanielsen (IA) Inatsisartut aatsitassanut inuussutissaqarnermullu ataatsimiititaliaanut akissummi oqarpoq.
Ataatsimiititliammi aatsitassanut naalakkersuisup uranimik inerteqquteqalernissamut siunnersuutaanik misissuivoq.
Kuannersuarni suliniut pillugu paasissutissat piviusut:
- Kuannersuit Narsap kilometerinik 7,5-inik ungasitsigisumi avannarpasissortaaniippoq.
- Aatsitassarsiorfik asimi 700 meterinik qutsitsigisumiipppoq.
- Greenland Mineralsip aatsitassarsiorfk ukiuni 37-ni piiaaffiginiarpaa.
- Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
- Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
- Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
- Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut ) 111 millionit tonsiussalluni.
Paasissutissarsiffik: Greenland Mineraliimt ASN aamma ISN.
AAMMA ATUARUK Uranimik inerteqquteqarniarneq alloriarfiusoq illuatungiliuttulli itigartitserusuttut
Siunnersuutip nunatsinni uranimik misissueqqaarnermut, ujaasinermut piiaanermullu akuersissutit unitsinneqarnissaat siunertaraa.
Tamatuma saniatigut Naalakkersuisut killiliinermik atulersitsiniarput.
Uraniunngitsumik piiarusuttoqartillugu piiarneqarusuttut agguaqatigiisillugu tonsimut 100 gramimit, 100 ppm-imit, oqinnerusumik uranitaqarpata, misissueqqaarnerit, ujaasinerit piaanerillu inerteqqutaanavianngillat.
Tamanna pissutigalugu Greenland Mineralsip Kuannersuarni aatsitassarsiornermik suliniutiginiagaa unitsinneqarsinnaavoq, pissutigalugu suliniummi aatsitassat uranimik 300 ppm-mit annerusumik akoqarmata.
Taarsiiviginnittoqarnanilu akiliisitsisoqarnavianngitsoq
Uranimut inerteqquteqarneq atuutilissappat Greenland Mineralsilu piiaanissamut akuersissuteqarfigineqarsinnaassaguni aatsitassarsiutileqatigiiffik misissuinermut aningaasartuutiminut taarsiititsiniarnersoq akiliisitsiniarnersorluunniit ataatsimiititaliap paaserusuppaa.
Greenland Minerals taamaaliorsinnaanngitsoq, Naaja Nathanielsen oqarpoq.
- Pisinnaatitsissummik pigisaqartunut uranimut inerteqquteqarnermit sunnerneqartunut taarsiissuteqarnermik imaluunniit allatut taarsiilluni akiliinissamut inatsimmi tunngavissamik siunnersuummi aalajangersaasoqanngilaq. Taamaalillutik Naalakkersuisut tunngavigaat, pisinnaatitsissummik pigisaqartut siunnersuutip piviusunngortinneqarnera tunngavigalugu piiaanissamut akuersissummik pissarsisinnaassanngikkaluartut, pisinnaatitsissummik pigisaqartut aatsitassarsiorluni misissuinermut aningaasartuutit akilerneqartut taarserneqarnissaannik qinnuteqarsinnaanngitsut.
AAMMA ATUARUK Kuannersuarnut tusarniaaneq ullumi unissaaq: Uranisioqqusaajunnaarnissaq tullinnguuppoq
- Taamaalilluni Namminersorlutik Oqartussat taarsiinissamik akisussaatinneqartussaanngitsut Naalakkersuisut isumaqarput.
Aningaasat 145 millionit koruunit Naaja Nathanielsenip innersuussutigisai nunatsinni aatsitassanik misissuinernut aningaasartuutinut tamanut sanilliunneqarsinnaapput. Taakku nunatsinni nunaniluunniit allani atorneqarsimasinnaapput.
Millionilippassuit ikinnerpaamik affaat nunatsinni misissuinermik suliaqarnermut assersuutigalugulu qulimiguulimmik attartornernut atorneqartut, aatsitassanut naalakkersuisoqarfiup KNR-imut paasissutissiissutigaa.
