Kuannersuarni immikkut ittumik aatsitassarsiornermik australiamiut ingerlatsiviat Greenland Minerals A/S akuersissummik qinnuteqarsimapput.

Aatsitassarsiornermik ingerlatsivik Kujataani Kuannersuarni aatsitassarsiornermini urani pingaarnertut qallornianngilaa, kisianni aatsitassarsiornermi pingaarnertut qallorneqartussat sinnikuattut urani suliariniarlugu.

Kisianni Naalakkersuisut tamanna akuerinngilaat.

Aatsitassarsiornermik ingerlatsivik aatsitassanik piiaanissamut allaanerusumik qinnuteqaataa, Aatsitassanut Inatsisillu Atuutsinneqarnerannut Naalakkersuisoqarfiup itigartillugu septembarip 8-ni nalunaarutigaa.

Itigartitsinermut suna peqqutaanersoq, naalakkersuisut erseqqissaatiginngilaat, kisiannili aalajangiinerup oqaasertai tamakkiisut kingusinnerusukkut, Greenland Minerals A/S oqaaseqaateqarnissamut periarfissinneqareernerata kingorna, tamanut saqqummiunneqassasoq  naatsorsuutigineqarpoq.

Aatsitassarsiornermik ingerlatsivik Kuannersuarni piiaarnissamut akuersissummik allaanerusumik qinnuteqaataa, qallorneqartussat sinnikuattut uranimik suliarinninnissamik imaqartoq, juunimi itigartinneqarpoq.

Naalakkersuisut itigartitsineri pipput, naak Greenland Mineralsip Kalaallit Nunaanni oqartussanik eqqartuussivikkut suliassanngortitsiniarluni maaji qiteqquttoq sioorasaarutigigaluaraa. Inatsisartut amerlanerussuteqartut, aatsitassanik qaqutigoortunik Kuannersuarni aatsitassarsiorfimmi nutaami qalluisinnaanermik pilersaarutitik 2021-mi unitsippaat.

Suliassanngortitsineq pissappat tamanna nunatta karsianut milliardiikkaanik akeqarsinnaasoq Kammeradvokatip taamani nalilerpaa.