Greenland Minerals: ASN-iliavut naammassingajalerpavut
Kuannersuarni aatsitassarsiorfissap avatangiisinut sunniutigisinnaasaanik naliliineq (ASN) inaarsarneqaleruttorpoq.
Greenland Mineralsip avatangiisinut sunniutigisinnaasaanik naliliinermut nalunaarusiani (ASN) nutartigaq qanittukkut saqqummiutissangavaa.
Greenland Mineralsip nalunaarusiaani ataasiinnarluunniit Aatsitassarsiornermut Naalakkersuisoqarfiup Aatsitassanik Suliassaqarfinnut Avatangiisinut Aqutsisoqarfianit (ASAA) maannamut akuerisaanngilaq.
Avatangiisinullu sunniutigisinnaasaanik naliliinerit (ASN) inaarsarneqangajalertut, aatsitassarsiorfik nammineq isumaqarpoq.
Kuannersuarni aatsitassarsiorfissamut tunngatillugu ASN-it marlunngorpat inaarsarneqassangatikkitik, aatsitassarsioqatigiffiup nalunaarutigaa.
- Kalaallit Nunaanni aatsitassanut oqartussat attaveqaqatigaavut, taakkualu ASN-iliatsinnik misissuinissaminnut aamma piiaanissamut akuersissummik qinnuteqaatitsinnut atatillugu tulliatut isumagisassat pillugit pilersaarusiornissaminnut piareersimapput, aatsitassarsioqatigiiffik allappoq.
Vittus Qujaukitsoq tapersiisoq
- ASN-imik nalunaarusiassamut missingiut Avatangiisinut aqutsisoqarfimmit, Pinngortitaleriffimmit Aarhusillu Universitetiata Avatangiisinut Nukissiuuteqarnermullu Misissuisoqarfianit misissorneqarpoq.
- Missingiutip misissorneratigut ilaatigut qulakkeerneqassaaq aatsitassarsiornerup iluani piumasaqaataasut naammassineqarnersut.
- ASN-imik nalunaarusiamut missingiut piumasaqaatinik naammassinnippat Naalakkersuisut aalajangiisinnaapput tamanut tusarniaasoqassasoq.
- Naalakkersuisut aatsaat tusarniaasoqareerpat ASN-imik nalunaarusiaq inaarutaasumik akuersissutigisinnaavaat.
Aatsitassarsioqatigiiffik aatsitassanut naalakkersuisumit, Vittus Qujaukitsumit (NQ), taperserneqarpoq, Greenland Mineralsilu aatsitassarsiornissaminut ingerlariaqqittoq taassuma sapaatip akunnerani kingullermi nalunaarutigaa.
Tamatuma saniatigut Tanbreezip Killavaat Alannguanni aatsitassarsiorfissarsua aamma pineqarpoq.
- Kujataani aatsitassat qaqutigoortut pillugit suliniutit marluk ingerlariaqqinneri nuannaarutigaakka. Suliniutit tamarmik periarfissaqaqaat.
- Suliniutit aallartinnissaannut pingaaruteqarpoq paasillugulu akuerinissaa, ilaatigut aatsitassat qaqutigoortut soqutigineqariartuaarneri piumaneqarnerilu atorluassallugit, Qujaukitsoq oqarpoq nangillunilu:
- Naalakkersuisut naatsorsuutigaat suliniutit marluusut aatsitassanut inatsimmi piumasaqaatinut piaartumik naapertuutilissasut, taamaalilluni Kujataata aatsitassaleriffinngornissaanut periarfissaqalissammat.
Sinnikunut igitassanullu sapusiorniartoq
Aatsitassarsionermit sinnikut igitassallu sumut eqqarneqarnissaat Greenland Mineralsimut unammillernartut ilagaat.
Taakkua soorlu atortussiassaasinnaapput saffiugassat oqimaatsut sinnikuinik akullit.
Aatsitassarsiornermut Naalakkersuisoqarfik naapertorlugu aatsitassarsioqatigiiffik qinngornerit sunniisinnaanerannut akoorutissanillu Narsami kuummut Sermilimmilu nunamut kuuaartoqarsinnaaneranut tunngatillugu siusinnerusukkut naliliinerlussimavoq.
Aamma sinnikunut igitassanullu sapusiat nunap sajussinnaaneranut qajannaarsorneqarsimannginnerat, tamatumalu kingunerisaanik sinnikut igitassallu nunap sajunnerani pinngortitamut teqqarsinnaanerat aamma ernummatigineqarpoq.
Tamannali iliuuseqarfigisimagini, aatsitassarsioqatigiiffiup nalilerpaa.
Nunatsinni Danmarkimilu Ujarassiuutut Misissuisoqarfimmit, GEUS-imit, paasissutissat naapertorlugit aatsitassarsioqatigiiffiup sinnikunut igitassanullu sapusiassani nunap sajorujussuarsinnaaneranut qajannaarsorneqarluarsimasutut nalilersimavai.
Greenland Minerals A/S Kuannersuarni aatsitassarsiorfiuteqarpoq, tassanilu saffiugassanik qaqutigoortunik pingaarnertut uranimillu tapertartut qalluerusulluni.
Saffiugassat qaqutigoortut oqarasuaatinik angallattakkanik tabletinillu nioqqutissiornermi atorneqakkajupput.
