Greenland Express timmissartuusseqqilernissaa qanillisoq
Timmisartortitseqatigiiffiup pisortaa Gert Brask aviisimut Nordjyskemut ippassaq pingasunngornermi taama oqaluttuarpoq.
- Marsimi apriilimiluunniit timmisartuussilernissarput naatsorsuutigaarput, Gert Brask oqarpoq.
Greenland Expressip Aalborgip Nunattalu akornanni Københavnikkoortumik Islandikkoortumillu timmisartuussisarneq siorna aasakkut aallartippaa. Qaammatialuilli ingerlareersut timmisartuussinissallu arlallit taamaatiinnarneqareersut Gert Braskip timmisartuussisarnerit unitsiinnarpai.
Tamatumuunali allaanerussasoq, Gert Braskip oqaatigaa.
AAMMA ATUARUK Greenland Expressip timmisartuussinerit unitsikkallarpai
Ilaatigut Nordjyskemut oqaatigaa, timmisartuussinissamik pilersaarut maanna pitsaanerussasoq, "Europami timmisartortitseqatigiiffimmik anginerusumik" isumaqatigiissuteqarsimagamik timmisartorlu Airbus A319 116-inik ilaasoqarsinnaasoq atorlugu timmisartuussisalersinnaassagamik.
Unammilleqatigiinnermut tunngatillugu ingerlatseqatigiiffik suna pineqarnersoq oqaatigisinnaanngikkallarlugu aviisimut aamma oqaatigaa.
AAMMA ATUARUK Greenland Express isertitanut naleqqiullugu aningaasartuuteqarneruvoq
Timmisartortitseqatigiiffiup timmisartumik allamik atuisussanngorneratigut ukioq kaajallallugu timmisartuussisoqarsinnaalissaaq, ilaassutissanillu inniminniisarnermut atortorissaarummik nutaamik atuilernikkut aammalu nittartakkap nutarterneratigut Gert Brask isumalluarluartoq, aviisi taama allaaserisaqarpoq.
- Kalaallit Nunaata iluani timmisartuussinissamut Namminersorlutik Oqartussanit akuersissummik tunineqarnissarput maanna utaqqimaarparput, taamaaliornikkummi ilaasutta ingerlaqqinnissaat nammineerluta isumagisinnaanngussagatsigu. Tamannalu assut pissanganartipparput, iluatsissappammi timmisartut tamatumunnga atugassat marluk pigereeratsigit, aviisimut taama oqarpoq.