Greenland Express timmisartuussissanngikkallarpoq
Aalborgip nunattalu akornanni angalaqqaarneq juunip ulluisa 17-ianni pissasoq maanna naatsorsuutigaa.
Timmisartuussisarneq pillugu atuagassiaq Check In naapertorlugu, Greenland Express maanna timmisartumik Fokker 100-mik qaliparlaamik Aalborgip mittarfianiititaqarpoq. Akuersissutilli pisariaqartut suli utaqqineqarput.
Greenland Expressip Hollandimi timmisartortitseqatigiiffik Demin Air isumaqatigiissuteqarfigisimavaa, taassumalu timmisartuutai timmisartullu aquttui atorneqassapput. Timmisartulli Demin Airip ingerlatsinissamut akuersissutaanut ilanngunneqarnissaa suli amigaatigineqarpoq, aammalu timmisartoq Danmarkip nunattalu akornanni timmisartuussinissamut danskit oqartussaasuinit akuerineqaqqaartussaalluni.
Juunip aappaanit timmisartuussinissanut ilaasussaagaluartut attaveqarfigineqareersimapput, timmisartortitseqatigiiffinnullu allanut nuunneqanngikkunik billettit utertinneqarsimallutik.
Aalborgimit Københavnikkut Reyjavikimilu Keflavikip mittarfiatigut Narsarsuarmut Kangerlussuarmullu sapaatit akunneranut arfinileriarluni timmisartuussisarnissaq Greenland Expressip pilersaarutigaa.
Greenland Expressip aallartisarniarnera imaannaasimanngilaq innuttaasullu akornanni annertuumik oqallisigineqarsimalluni. Tamannalu aallartitsisup Gert Braskip qatsussimarpasippaa.
Nittartagaq Sermitsiaq.AG naapertorlugu, Facebookimi quppernermini allappoq ingerlatseqatigiiffik sukkanerpaamik qimakkusullugu, piserusuttumullu siullermut pitsaanerpaamullu tunerusullugu.
