Greenland Express aallaannaqaaq

Arlaleriarlugu kinguartinneqarsimagaluartoq ullumi iluatsinneqarpoq. Greenland Express Aalborgimit Narsarsuarmut timmisartuussinissami siullersaat aallartippaa.
Allattoq Martine Lind Krebs, Simon Uldum
juunip 17-at 2014 08:48

Timmisartoq Hollandimi timmisartortitseqatigiiffimmit Demin Airimit pigineqartoq, Aalborgip mittarfianit ullaaq nalunaaqutaq arfineq-pingasunut Københavnimut aallannaqaaq. Nalunaaquttap-akunnerata aappaa avillugu tassaniissinnarluni Reykjavikimut aallarpoq Islandimilu nalunaaqutaq malillugu 11.55 Narsarsuarmut ingerlaqqissalluni.

Timmisartuussinerit siullersaat juunip aappaani pisussatut pilersaarutaasimagaluarpoq, Demin Airilli oqartussaasunit akuersissutinik tunineqarsimannginnera pissutigalugu kinguartinneqartariaqarsimalluni.

Greenland Express timmisartuussissanngikkallarpoq

Check-in.dk naapertorlugu Greenland Express billetsit tamakkerlugit tunisinnaasimanngilai, ippassarlu tikillugu billetsisisoqarsinnaasimalluni.

Timmisartuusseqqaarnerit allat assingalugit aamma nalliuttorsiortoqanngilaq. Aalborgip Mittarfiata pindemadinik champagnemillu sassaalliinissamik neqeroorutaanut Greenland Express qujaannartariaqarsimavoq.

- Nalliuttorsiutiginngilarput, kingusinnerusukkut aatsaat. Maannakkorpiaq piffissaqanngikkallarpugut, pisortaq Gert Brask check-in.dk-mut oqarpoq.

Aamma atuaruk