Greenland Contractorsip suliassanngortitseqqiiniarneq ilalerpaa

Ingerlatseqatigiiffiit kiffartuussinissamik isumaqatigiissutip suliariumannittussarsiuunneqarnerani ajorsartuusut Greenland Contractors I/S, Per Aarsleff A/S aamma Copenhagen Arctic A/S tamarmiullutik eqqartuussutigineqartoq kingulleq taamaasillutik suliassanngorteqqippaat.

Eqqartuussivimmit allagaatit naapertorlugit Danmarkimi inuussutissarsiummik ingerlataqartunik nalunaarsuiffik, CVR-registret, ingerlatseqatigiiffiit suliariumannittussarsiuussinermut peqataasinnaatitaassagunik nalunaarsorsimaffigisassaat assortuussutigineqarnerpaasut ilagaat.

Ingerlatseqatigiiffiulli Danmarkimeersunit imaluunnit allamiunit pigineqarnersoq nalunaarsorsimaffimmi atuarneqarsinnaanngilaq. Tamannalu amerikamiut sakkutuuisa timmisartortartut suliariumannittussarsiuunnermi atortussat suliarinnginnerini sukumiisumik misissoqqaarsimasariaqaraluarpaat, ingerlatseqatigiiffiit suliariumannittussarsiuussinermi ajorsartut taama isumaqarput.

Taamaammat amerikamiut sakkutuuisa timmisartortartut, USAF-ip, piareersaateqarnerminni naammaginartumik suliaqarsimanersut Per Aarsleffip, Copenhagen Arcticip GC-llu eqqartuussivimmit naliliiffigiteqqikkusuppaat.

USAF-ili eqqartuussivimmut akissuteqarluni allappoq ingerlatseqatigiiffiit Pituffimmi kiffartuussinissamik isumaqatigiissutip 2,4 milliardit koruuninik naleqartup suliariumannittussarsiuunneqarneranut peqataannginnerminni suliariumannittussarsiuussinermi atortussani kukkuneq namminneerlutik erseqqissaatigisimasariaqaraluaraat.

Amerikami eqqartuussivik suliaq pillugu tusarniaasoqaqqinnissaanut piareersimanersoq sapaatit-akunnerata matuma aallartinnerani aalajangiiffigineqassaaq.