Greenland Adventure Race Narsarsuarmi aallartippoq

Ulluni tallimani timersuut sakkortooq kujataani ingerlanneqartartoq Greenland Adventure Race ippassaq Narsarsuarmi aallartimmat 30 kilometerit atorlugit sermersuarmut arpattoqarpoq, ilaatigut kuuk ikaarneqarluni.

Angutini siulliit sisamat unammilaavissorput. Siulliullutik apuullutik Danmarkimi Holstebromeersut Anders Poulsen Sebastian Lundgren-ilu, taakkua akunnerit sisamat minutsillu 34-t atiorlugit arpapput.

Tulliullutik apuuttut aamma Holstebromeersuupput tassaasut Dennis Deleuran Lars Ole Pedersenilu, taakkua minutsit marluk kingulliulaarlutik apuupput.

Pingajuullutik apuuttut nunatsinneersut imminnut ’Sisimiut boys’-inik taasimapput, tassaasut Jørgen Leander Niels Berthelsen-ilu, taakkua akunnerit sisamat minutsillu 43-t arpassimapput.

Arnat unammineranni peqataasut tamarmik Qaqortumeersuupput. Siulliullutik apuuttut tassaapput Amma Kleist Susanne Bak arpaqatigalugu. Taakkua akunnerit arfinillit minutsillu 40-t arpassimapput.

Arnani tulliullutik apuupput Pitsi Ottosen aamma Bibi Kielsen akunnerit arfineq pingasut minutsillu 16-it arpassimasut.

Greenland Adventure Race-mi arpaqataasut ullumi cykelinik mountainbikenik Narsarsuarmiit Sillisinut 50 kilometerit ingerlaassavaat.