Great Greenlandip qanoq aqunneqarnissaa suli ilisimaneqanngitsoq
- Suli siulersuisuni aalajanginngilarput kina pisortatut paarlattaagallassanersoq, Great Greenlandip siulersuisuini siulittaasoq Erik Sivertsen KNR-imut oqarpoq.
Ditte Sorknæs pisortaanertut taamaatinniarmat Erik Sivertsen uggornaraa. Erseqqissaatigaalu pisortaajunnaartussap sulinera naammagisimaarsimaqigamikku.
- Isumaqarpugut Ditte Sorknæsip ukiut kingullerni Great Greenlandip aningaasaqarnikkut inissisimanera eqqarsaatigalugu suliani naamaginarluinnartumik ingerlassimagaa,
Siulersuisuni siulittaasoq oqaluttuarpoq pisortanngortussamut inuttassarsiuussinissaq qaqugulu atorfinitsitsisoqassanersoq suli piffissalerneqarsimanngitsoq. Siulersuisut februaarip qaammataani ataatsimiissapput, tassanilu ilaatigut pisortanngortussamut suut piumasaqaataassanersut eqqartorneqassapput, tassani aamma pisortap immikkut aaqqiivigisassaa pineqassalluni.
- Great Greenlandimi pisortap naammassisassai eqqarsaatigalugit uaniinnerussapput ukiuni kingullerni tunisat annikilliartorsimasut siumut aallarteqqinnissaat,
Ditte Sorknæsip aamma uparuarsimavaa ammit tunisat ikinnerujussuisa Great Greenlandimut unammillernarnersimaneri. Puisit amiisa Nunatsinneersut pitsaasut piumaneqarnerujussuinut maannakkut ammerivik malinnaasinnaarpianngilaq.
Siulersuisut februaarip qaammataani ataatsimiinnerminni pisortassamik nassaarnissap tungaanut kina pisortaangallassanersoq aalajangissagaat Erik Sivertsen oqarpoq.
