Great Greenlandip killilersorneqarunnaarnertik nuannaraat

Ammeriviup Great Greenlandip puisit amiinik Canadameersunik pisiortornerata unitsinneqarallarnissaanik Naalakkersuisut januaarimi aalajangernertik tallimanngormat maajip ulluisa 19-ianni atorunnaarsippaat. Ammeriviup siulersuisuisa pisariaqalerpat pisisinnaaqqilernertik nuannaarutigaat. Siulersuisuni siulittaasoq Anders Brøns ima oqarpoq.

-Assut iluaraarput taama periarfissaqaleratta. Ukioq manna pisinavianngilagut, kingusinaareerpugut aammalu pisariaqarsimanani, kisianni ukiup naajartuaarnerani nalilerumaarparput avataaninngaanniit pisinissaq pisariaqassanersoq, apeqqutaassaaq nunatsinni ameerniartut qanoq tunisaqartigisimanerat. Great Greenlandip siulersuisuini siulittaasoq oqarpoq.

Ukioq 2006 aallartilaartoq januaarip arfernganni Namminersornerullutik Oqartussat Great Greenland peqquaat puisit amiinik Canadameersunik pisisarunnaassasoq, kingornali naggueqatitta najugaqarfiinit pisisoqarsinnaanera akuerineqarpoq. Avataaneersunik killilersuilerneq Ammerivimmut sunniuteqarsimanerluni?

- Manna tikillugu sunniuteqarnikuunngilaq, siorna aatsaat taama amerlatigisunik puisinik tunisisoqarnikuuvoq, 120.000-t tungaanut. Kisianni siunissami sunniuteqartussaassaaq, siorna tulaanneqartut aatsaat taama amerlatigipput 118.000-ugamik. Naatsorsuutiginngilarpulli ukioq-manna taama amerlatigisunik tunisisoqarnissaa. Takoreerparput tunisat qaammatit siulliit pingasut 10 procentit missaannik appariarsimasut. Anders Brøns oqarpoq.

Ammeriviup siulersuisuisa sinerissap aalisaganinnissaa ilimanarsereermat naatsorsuutigaat aalisartut piniartullu puisinniarnerminngaannit aalisarnermut ikaarsaarnissaat. Taamaattumik Canadamiut puisit amiutaannik aappaagumit killilersorneqaratik pisisinnaalernissartik iluaraat.

Canadami puisit apriilimi toqorarneqalertarput.

Aalisarnermut Piniarnermullu Naalakkersuisoq Finn Karlsen Ammerivimmi pissutsinik misissuinissamik maannamut oqaaseqartuarsimasoq puisit amiinik Canadameersunik killilersuiunnaarnermut atatillugu oqaaseqartinniaraluaratsigu iluatsinngilarput.