Great Greenland 5,3 millioni koruuninik amigartoorpoq
Kalaallit Nunaata Ammerivia Great Greenland 5,3 millioni koruuninik 2008-mi amigartooruteqarpoq.
Amigartoornerup kingunerisaanik ammerivimmi aningaasaqarnikkut sukangasumik aqutsisoqassaaq, aningaasaliissutissat tamarmik minnerpaaffianniitinneqassallutik ingerlatsiffiullu sullissinissamik isumaqatigiissummi pisussaaffigisassani kisiisa ingerlatissavai, tassa puisit amiinik tigooraanginnassalluni.
EU-mut puisit amiinik eqqussueqqusiunnaarneq naggueqatigiit inunnut qanoq kinguneqassanersoq maanna utaqqimaarneqartoq, Anders Brøns oqarpoq.
Amigartoornerup saniatigut kaaviaartitat marloriaatigajammik aamma appariarput, tassa 2007-imi 27,8 millioni koruuniniit 2008-mi 15,7 millioni koruuninut appariarmata, tassa puisit amii akitsorterinermi 2008-mi tunineqanngitsoormata.
Puisit amiisa tunineqartarnerisa unitsinneqarnerat atorunnaarsinneqassanersoq inatsisartuni partiit siuttuisa ullumi ataatsimiissutigaat, qanorli aalajangiisoqarnersoq Radioaviisimit paasiniaraluaratsigu iluatsinngilarput.
