MIO Meeqqanik perorsaanermi killiliisarneq pillugu atuakkiaq saqqummersinneqarpoq
Atuagaq Meeqqanik perorsaanermi killiliisarneq - Sooq killiliisoqartarpa - kiisalu killissat sumiippat?’ akeqanngitsumik agguaanneqassaaq.
Angajoqqaat, isumassuisut allat meeqqallu meeqqanik perorsaanermi killiliisarnermut atatillugu sinaakkutissanik ujartuinerannut qisuariaatitut atuagaq saqqummersinneqarpoq.
- Kalaallit Nunaanni najugaqarfinni assigiinngitsuni 34-ni angalareerlunga, uppernarseqqippara, meeqqanik perorsaanermi killiliisarnermut atatillugu sinaakkutissanik meeqqanut angajoqqaat isumassuisullu allat amigaateqartut, Meeqqat illersuisuat Aviaaja Egede Lynge atuakkamik saqqummersitsinermut atatillugu taama oqarpoq.
- Meeqqap pisinnaatitaaffigaa killilerneqarnissani, inersimasorlu tassaavoq pisinnaatitaaffimmik tamatuminnga eqquutsitsinissamut akisussaasuusoq, meeqqat illersuisuat erseqqissaavoq.
Atuagaq meeqqanut siunnersortimit Ellen Bang Bourupimit tarnillu pissusianik ilisimasalimmit Amalia Lynge Pedersenimit atuakkiorneqarpoq.
Atuagaq kommuninut tamanut atuakkamik tunniussuisussanut nassiussuunneqarpoq.
Nuummilu innuttaasut atuagaq Brugsenip isaariaani akeqanngitsumik pissarsiarisinnaavaat.
