Kalaallit nangeqattaartuliaat amerikamiut festivalianni takutinneqalersoq
Taakkulu oqaluttualiarineqartut pitsaasuunersut isiginnaartartunillu soqutigineqarnersut paasiniarlugu misiliutigineqartarput.
Pilotinillu taama ittunik festivalit nunarsuarmi anginersaat USA-mi naalagaaffimmi Coloradomi illoqarfimmi Denverimi ukiut tamaasa ingerlanneqartarpoq. Festivali taaguuteqarpoq SeriesFest, ukioq mannalu festivalimi juunip 22-anit 27-anut ingerlanneqartussami kalaallit misiligutitut filmiliaat takutinneqartussanngorpoq.
Tassalu nittartakkatigut nangeqattaartuliaq "Polar", Katuami siorna novembarimi takutinneqaqqaartoq.
Nangeqattaartuliami "Polar"-imi nuummiut inuusuttut oqaluttuarineqarput. Taakku nipimik pingortitameersumik eqqumiitsumik nalaataqarput kingornalu arlallit imminnut toqupput. Qujanartumilli uummaqqipput, inuusuttullu ilaat marluk aalajangerput nipi suminngaanneernersoq sumillu oqaluttuarniarsarinersoq misissorniarlugu.
AAMMA ATUARUK Nangeqattaartuliaq POLAR takuteqqaarneqalersoq
"Polar"-imik suliarinnittoq tassaavoq Aka Hansen, kalaallit pissangaammernartuliaannik Qaqqat Alannguinik aamma suliarinnittuusoq.
Nangeqattaartuliaq "Polar" Amisuna Berthelsenimit Josef Tarrak Petrussenimillu pingaarnertut inuttaaffigineqarpoq.
"Polar"-imullu pilotiliarineqartoq Denverimi juulip naalernerani SeriesFesteqarnerani marloriarlugu takutinneqassaaq.
Taava neriuutigiinnassavarput filmiliortitsisartunit Holloywoodimeersunit soqutigineqassasoq, taamaaliornikkut nangeqattaartuliatut ilivitsutut suliarineqarsinnaasunngorlugu.