Kalaaleq isiginnaartitsisartoq Reumertimik nersornaasigassatut innersuunneqarpoq

Isiginnaartitsisartormi nunatsinneersoq Danmarkimi isiginnaartitsisarnermi nersornaammut Reumertimut siullerpaamik innersuunneqarsimavoq.
Klaus Geisler assimi saamimmit nr. 2-juvoq. Assi © : Gerth Lyberth / Nunatta Isiginnaartitsisarfia
Allattoq Karsten Sommer
maajip 01-at 2019 07:17
Nutserisoq Mads Lynge

46-nik ukiulik Klaus Geisler, isiginnaagassiami Angutivik-mi peqataanerminut nersornaasigassatut innersuunneqarpoq. Isiginnaartitsissusiaq Angutivik Nunatta Isiginnaartitsisarfiata Danmarkimilu isiginnaartitsisarfiup FreezeProductionsip suliaraat.

”Angutivik” oqaatsit marluiit atorlugit isiginnaagassiaavoq, atuakkiortumit Niviaq Korneliussenimit allataalluni kalaallillu angutip nutaaliaasup ukiuni untritilinni nutaani qanoq ittuunera oqaluttuarineqarpoq. Isiginnaagassiaq nunatsinni siorna angallanneqarpoq, soorlu aamma Danmarkimi Savalimmiunilu takutinneqartoq.

Klaus Geisler isiginnaartitsisartutut Nationalteaterets Skuespilskolemi 2012-imit 2014-ip tungaanut ilinniartuuvoq.

Danmarkimi isiginnaartitsissusiani isiginnaartitsinermi peqataasut Reumertimik nersornaaserneqarnissamut innersuunneqarsinnaapput. Bikubenfonden Reumertimik nersornaasiisarnermi tunuliaqutaavoq, immikkoortunilu 16-ini Reumertisititsisarluni.

Klaus Geisler, Danmarkimi isiginnaartitsisartut marluk allat, Morten Suurballe Peter Gilsfortilu peqatigalugit Reumertimik nersornaasigassatut innersuunneqarpoq. Nersornaasiineq tv-kkut toqqaannartumik juunip ulluisa aappaanni takutinneqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq