Kalaallit Illuutaat: Kalaalimernit suaasaannaanatillu panertuinnaanngillat
Kalaaleq igasoq Mikael Møller nerisassiorluni nutaaliornermut arfininngornermi aaqqissuisunut ilaavoq.
- Pilersitsinermut siunertaavoq illup inunnik nuannaartunik ulikkaarnissaa. Nuanneqaaq inuit nereqatigiisissinnaallugit, nerisassammi pitsaasut inuit katersorsinnaajuaannaraat Mikael Møller oqarpoq. Taanna siornatigut Kalaallit Illuutaat peqatigalugu assingusunik aaqqissuussisareersimavoq.
Kalaallit Illuutaanni inunnut 40-nut inissat januaarimi tuniniarneqalerput.
Suluppaagaq, sulluitsulerlugu iipililerlugulu siuleqqiutaavoq, nerisassartaa nerleq aserortikkanik naatsiialik uanitsulillu. Chokoladebombemik taasaat kalaallit kuanniutaannik kigutaarnaannillu akusaq kinguleqqiutaavoq.
- Takutikkusuppara kalaallit nerisassaataat taamaallaat suaasaanatillu aalisakkat panertuunngitsut, Mikael Møller oqarpoq, Taanna upernaamut pilersaaruteqarpoq Aarhusimi Kalaallit Illuutaanni arfininngornermisut aaqqissuusseqqinnissaq.
