Grønlandsbanki: Mastercard debetkortimik atuisut teknikikkut ajutoornermit eqqugaasut

Mastercard debetkortimik atuisut akiliutaat qaammat sinnilaarlugu ilanngaatigineqarsimanngitsut aatsaat ippassaq pingasunngornermi ilanngaatigineqarput

Allattoq Anders Dall, Else Olsvig

marsip 31-at 2022 10:00

Mastercardi debetkorti atorlugu februaarip 16-anniit martsip 22-annut akiliisarsimaguit pingasunngornermi martsip 30-anni kontonniit aningaasarpaalunnik naatsorsuutigisannit amerlanerusunik ilanngaassivigineqarputit.

Danmarkimi bankit edb-centralianni teknikikkut ajutoortoqarneratigut akiliutigisimasat aatsaat pingasunngornermi tamarmik ilanngaatigineqartut, Melissa Zeeb Grønlandsbankimeersoq nassuiaavoq.

- Sullitatta ilaat Mastercard debetkortillit pisiniarfinni internetikkullu niuertunut pisiniarsimagaangata aqaguani ilanngaassivigineqartarsimanngillat. Taamaammat peqquserluutaanngilaq, hackerisoqaranilu, kisiannili kingusinaartumik aningaasat martsip 30-anni nusunneqarput.

Melissa Zeeb aamma oqarpoq sullitat qassit eqqugaanersut kisitsisaatigineqanngitsut.

Taamaattumik Grønlandsbanki sullitaminut kajumissaarivoq naatsorsuinerit namminneq pigisanut eqquunnersut misissoqqullugit.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.