AWG 2018 Kalaallit Futsalertartoqatigiit sisamat pissartanngorniuterusullutik sukataarput

Kalaallit Canadami Hay Riverimi Arctic Winter Gamesertoqarnerani futsalimut peqataasut semifinalinut anngupput. Arsaattartoqatigiit sisamat semifinalinut anngupput.
Assi © : Simon Uldum
Allattoq Mads Lynge
marsip 23-at 2018 11:09

Niviarsiaqqat juniorit semifinalernerminni Alaska unammissavaat. Taakku gruppini unammeqattaarnerminni Alaska aamma naapippaat, 7-4-millu taamanikkut ajugaallutik. Emma Kristina Thomsen niviarsiaqqani juniorini arfineq-marlunnik maannamut isertitaqarluni isertitsinerpaavoq.

Nukappiaqqani juniorini kalaallit Yukonimut semifinalimi unammissapput. Gruppini unammeqattaarnermi taakku aamma naapipput, naligiillutik 2-2-rput. Unamminissaat taamaammat pissanganassaaq.

Kalaallit niviarsiaqqat inuusunnerit juvenilemi semifinalernerminni Northwest Territories unammissavaat. Niviarsiaqqallu inuusunnerit ingerlalluarput sulilu ajorsartinneqaratik. Gruppini unammeqattaarnerminni unammisartik kingulleq tassaavoq Alaska, 15-1-imik tassani ajugaallutik.

Asii Kleist Berthelsen niviarsiaqqat inuusuttut juvenilet akornanni isertitsinerpaavoq, taanna 22-riarluni maannamut isertitsigami.

Kalaallit nukappiaqqat inuusunnerit juvenilet semifinalimi unammisassaat tassaapput Northwest Territories. Gruppimi unammeqattaarnermi taakku aamma naapipput, kalaalillu 22-1-imik ajugaallualaavillutik.

Nemo Thomsen taakkunani maannamut isertitaqarnersaalluni 18-inik isertitaqarpoq.

Holdit futsalertartut taamaasillutik pissartanngorniutivinnissanut anngussinnaanissaat ilimanaateqarsinnaavoq.

 

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk