Grækenlandimi suliumajunnaarrattorsuupput
Allaammi akileraaruserinermik nakkutilliisut naalakkersuisunut naalagaaffiup aningaaserivianut aningaasanik pissarsiniarlutik ikiuunniartussaagaluit allaffimminniinngillat.
Naalakkersuisut ileqqaarniarnissatut pilersaarutaat nunap aningaasarsiorneranik aaqqiissutaaniartussaq manna tikillugu aatsaat taama annertutigisoq akerleriniarlugu griikerit 3 millionit sinneqartut ullumi suliaminnik unitsitsipput. Ritzauip tusagassiorfia taama allappoq.
Illoqarfiit pingaarnersaanni Athenimi akerliussutsiminnik takutitsisunut 50-it missaanniittunut ujaqqanillu milloortunut politiit gassi qulliliornartoq atorpaat. Tamakkua akerliussutsimik takutitsinerup annertuup eqqissisimasumillu ingerlanneqarsimagaluartup ilagai.
- Pilliuteqartoqassanngilaq, pisuut ajornartoorneq akilertariaqarpaat, akerliussutsimik takutitsisut 20.000-it inatsisartut ataatsimiittarfiata tungaanut ingerlaartillutik taama nilliapput. Grækenlandip illoqarfiisa annersaata tulliani, Thessalonikimi, 7.000-it missaanniittut akerliussutsiminnik takutitsipput.
Ullumi suliumajunnaarnersuaq sap. akunnerisa marluk ingerlaneranni suliumajunnaarnerup aappassaraa. Akerliussutsiminnik takutitsisut sulisartut kattuuffiinit aggersarneqarput naalakkersuisut ilaatigut pisortani akissarsiat allanngortikkumanngimmatigik, benziinap tupat imigassallu akitsutaat qaffanniarlugit ukiullu soraarnerussutisiaqarfiusussat 63-inut sivitsorlugit.
