Gori-p nakkutiginera russit Georgiami sakkutuunut tunniutilerpaat

Tusagassiorfiit nalunaarutaat naapertorlugit Georgiami illoqarfiup, Gori-p, nakkutiginera, russit sakkutuuisa Georgiami sakkutuunut tunniutilerpaat. Illoqarfimmi eqqissisimaneqaraluartoq russit sakkutuuisa Georgiamiut sakkutooqarfigisimasaannik quersuaqarfigisimasaannillu nakkutiginninnertik ingerlatiinnarpaat. Illoqarfiup ungasinngisaani qattunertani qaartitsisoqaqattaaraluartoq, russit generaliat oqarpoq, sakkunik ulluni arlalinni suli arsaartuigallassallutik, Gori-milu inatsisaatsuliornerit unitsillugit.

aggustip 14-at 2008 16:49

Georgiamiit avissaarniat, Ossetiap kujataaneersut Abkasiameersullu maanna Russit præsidentiat Moskvami ataatsimeeqatigeqattaarpaat. Dmitri Medvedev-ip avissaarniat siuttui qanorluunnit piumasaqassagaluarpata tapersersussallugit neriorsorpai. Russit præsidentiat aamma Kaukasusimi nunarsuatsinnilu avissaarniat siuttuisa akuerineqarnissaat qulakkeerniarlugu neriorsuivoq.

USA-lli Georgiami præsidentimut, Saakashvili-mut tapersersuinini naqissuserpaa sakkutuullu timmisartui atorlugit ikiuutissanik pajutsilereerluni. Amerikamiut nunanut allanut ministeriat, Condoleeza Rice Georgiami illoqarfiit pingaarnersaannut, Tblisi-mut tallimanngorpat tikissangatinneqarpoq.

Georgiami USA-p aallartitaata, Matthew Bryza-p oqaatigaa Georgiap NATO-mut ilaasortanngortinniarnissaanut sakkulersuunneq utoqqatsissutissatsialaasoq, tamannalumi USA-p Georgiallu præsidentiisa isertuunnagu anguniagaraat. Georgiami sakkulersuunnerup kingorna taamaalilluni NATO-p Ruslandillu akornanni pissutsit ajortilluinnarput.

Ruslandip nunanut allanut ministeria, Sergej Lavrov oqarpoq USA sorlernik tapersersuiniarnerluni aalajangertariaqalersoq, pissutsillu pisuusaarnermik aallaaveqarnerarlugit.

Gori-p nakkutiginera russit Georgiami sakkutuunut tunniutilerpaat

Aamma atuaruk