Gorbatjovip Ruslandimi siuttut avoqqaarai
- Assut ernumavunga. Kisermaassilluni aqutsinermit demokratiip kiffaanngissutsillu tungaanut aqqutip affaannaa killiffigisimavarput, Mikhail Gorbatjov oqarpoq.
Tusagassiorfinnit kitaaneersunit apersorneqarnermini Mikhail Gorbatjovip Ruslandimi pisortat, Vladimir Putin siuttuliullugu, pasillerpai demokratiimik aseruiniartuunerarlugit.
- Ernummatigaara taakku eqqarsartarunarmata nuna manna aqukkuminaatsoq kisermaassisumik aqunneqartariaqartoq, isumaqarput tamanna avaqqunneqarsinnaanngitsoq, Gorbatjov oqarpoq.
Gorbatjovip uparuarpaa Putinip 2004-mi akunnermiliuttunik qinersisarnerit atorunnaarsimmagit, nunap immikkoortuani guvernørit aamma Moskvami Skt. Petersborgimilu borgmesterit qitiusumik aqutsisunit toqqarneqartartunngorlugit.
Qaammat kingulleq aamma qitiusumik aqutsisut Moskvami borgmesteri pissaanilissuaq tunuartippaat Putinimullu tapersersuisumik taarserlugu.
Demokratii aallartittarpoq qinersinikkut, qinersineq, akisussaanermik pissaanermillu tunniussinikkut, taama oqarpoq Sovjetunioniusimasumi præsidenti kingulleq, Putinillu pissaaneqarfia, naalakkersuisoqarfik taakkartorlugu Sovjetunioniusimasumi kommunistpartiip aqutsineranik assilisapalaatut.
Naak eqqoroarneqartaraluartoq Putinip 2012-mi præsidentimut qinigassanngortinnissaa, Gorbatjovip ullumikkut præsidentiusumut Medvedevimut taakku angutit marluk assigiinngissuteqanngitsutut isigai.
Gorbatjov 1990-imi Nobelip Eqqissinermut nersornaasiuttagaanik nersornaaserneqarpoq, aningaasarsiamilu ilaat aviisimut kiffaanngissuseqartumut naalakkersuisunullu illuatungiliuttumut, Novaja Gazetamut, aningaasaliissutigai. Aviisimi tassani ilaatigut tusagassiortuusimavoq Anna Politskovskaja 2006-imi toqutaasoq Tjetjeniami Ruslandip inuit pisinnaatitaaffiinik qasusuilluni qulaajaareernermi kingorna.
