Google Facebookilu Australiami nakkutigineqarnerulertut
Allaffiit marluk Facebookimut Googlemullu nakkutilliisussanngorlugit Australiami pilersinneqarput. Taakku nittartakkatigut atuisut paasissutissaataannik iluamik isumaqatigiissusiortarnersut nakkutigissavaat.
Australiami aningaasaqarnermut ministerip Josh Frudenbergip nutaarsiassaqartitsivimmut Reutersimut tallimanngormat paasissutissiissutigaat.
- Taakku suliffeqarfissuit marluk nunarsuarmi pissaaneqarnerpaat aningaasaateqarnerpaallu ilagaat. Sullissineri avammut ammasuunerusariaqarput, Josh Frudenberg Australiami unammilleqatigiinnermut atuisunullu ataatsimiititaliap (ACCC) nalunaarusiaata saqqummiunneqarneranut atatillugu oqarpoq.
Facebookimi atuisut paassissutissaataat inuit naapittarfiini atorneqartarsimaneri suliffeqarfiup paasissutissiisimannginneranut 5 millionit koruuninik akiligassiisoqareersorlu Australiami nakkutiginninnerulertoqalernissaa aaliangiunneqarpoq.