Google akiligassinneqartoq
Googlep oqarasuaatinut angallattakkanut systemimut, Androidimut oqartussaanini atornerlussimammagu 4,34 milliardit euronik akiligassinneqartoq, EU-p unammilleqatigiinnermut kommissæriata, Margrethe Vestagerip ippassaq oqaatigaa.
Akiligassiissut danskit koruuninngorlugu 32 milliardit koruuniuvoq.
Akiligassiissut EU-p suliffeqarfinnut oqartussaanerminnik atornerluisimasunut akiligassiisarneranit anginerpaavoq.
Googlep Androidimut oqartussaanini atornerlullugu nunarsuarmi ujaasiffittut annerpaatut inissisimanini 2011-mili aserujaallisaraa, Vestagerip oqaatigaa.
Taassuma Googlep iliuuserisaminik unitsitsinissaanut ullunik 90-inik periarfissippaa. Taamaanngippat ullormut akiliisitaasalernissamik kinguneqassaaq.
Vestager naapertorlugu oqarasuaatinik angallattakkanik nioqqutissiortut Androidimik atugaqarniaraangamik Googlep nammineq app-iutaanik pinngitsaaliissummik aallartinneqartarput.
App-ip pineqartut tassaapput Googlep ujaasisarfia internetimullu appi Chrome.
/ritzau/