Nutaarsiassatsialak: Kaffi peqqinnarpoq

Ataasiaannarnagu marloriannarnaguluunniit, assersuutigalugu tallimariarluni kaffisoraanni peqqinnarnerusoq, Harvard University Chan School of Public Healthip misissuinerata takutippaa. Aviisi Berlingske taama allaaserisaqarpoq.

Ullut tamaasa pingasoriarluni tallimariarluniluunniit kaffisortaraanni sukkornermit uummallunnermiilluunniit Parkinsonernermiilluunniit toqquteqarnissaq 15 procentinik annikillisartoq misissuinerup takutippaa. Tassa ullormut ikinnerpaamik pingasoriarluni kaffisortaraanni peqqinnarneruvoq.

- Iluamik paaseqqissaanngilarput sooq kaffi tamakkuninnga pitsaaquteqarnersoq. Kaffi aserorterneqanngitsoq assigiinngitsorpassuarneq inuussutissartaqarpoq akoorutissanillu naasuneersunik aamma ulikkaarluni. Uangalu eqqoriaanera naapertorlugu, taakku ataatsimoortikkaanni pitsaaqutit paasisagut pisarput, Walter Willet Harvardimeersoq oqarpoq.

Paasisat peqqissaasut peqqinnissaqarfimmilu sulisut allat katillugit 300.000-it ukiut 30-t ingerlaneranni katersorsimasaat misissuinermi tunngavigineqarput.