Godmann Rasmussen: Angallannermut tunngasut ukiaru oqaluuserineqassapput
Inatsisartut umiarsuartigut angallassinermut tapiissuteqartarnerup eqquteqqinnissaa akuersaartariaqaraat, inatsisartut Attaveqarnermut Pilersuinermullu aamma Ineqarnermut Ataatsimiititaliaani siulittaasoq oqarpoq.
Atassummeersup Godmand Rasmussenip eqqumiigaa, Demokraatit Upernavimmi Uummannamilu umiarsuartigut angallanneq pillugu Uummannap borgmesteria, Jens Lars Fleischer, Siumumeersoq, ilungersoqqullugu kajumissaarimmata. Angallannermut inatsit inatsisartut ukiaanerani ataatsimiilerpata oqaluuserineqartussaq unnerlugu:
-Demokraatit uagutsitulli nalunngitsigaat ukiamut taanna oqallisineqartussaassasoq, aamma uanga tupigikujuppara tusagassiuutitigut nalunaarnerat. Tusagassiuutitigut inatsit pinngortinneqarneq ajorpoq. Namminneq pisussaaffeqarput isorisaqarsimagunik angallanneq pillugu inatsisartunut saqqummiusseriannguarlik, taava oqallisigissaqqaartarput, uagut soorlu taamaaliorpugut, Godmand Rasmussen aallartippoq.
- Pappialartaqanngitsumik sumilluunniit aaqqiisoqarneq ajorpoq. Siunnersuuteqarniarlik immikkuullarissumik aaqqiissutissamik siunnersuuteqarpata taava tikilluaqqukutsuussavagut, oqallisigissaqqaarpavullu.
Nunatsinni angallannermi timmisartunik salliutitsinissamik aalajangerneq kukkunerusutut isigaa.
- Tamavitta taanna nassuerutigisariaqarparput. Uagut aamma taamanikkut Atassumminngaanniit oqarpugut silaannakkut angallanneq aaqqissuunniarneqarnialermat imaatigut angallanneq peerneqassanngitsoq.
- Ilumoorpoq massakkut atuisartorpassuit sumi tamaani naammagittaaliutaat tusaanngitsuusaaginnarsinnaajunnaarparput. Kukkusimanivut nassuerutigisariaqarpavut. Nammineq iluarsiniartariaqarpagut, arlaatungaatigut ujartuinikkut naleqqussaaqqittuarneq avaqqunneqarsinnaanngilaq ineriartorfiusumi, Angallannermut ataatsimiititaliami siulittaasoq oqarpoq.
- Nunarput taamannak inukitsigitillugu sineriallu taama isorartutigitillugu piffiit ilaanni allaqqussinnaanngilaq, inuiaqatigiit nammaqatigiinnissamik oqariartuuteqarfigisaqatttaarlugillu immikkoortitsitsutut pissusilersorfigissagutsigit taanna tulluartuunngilaq. Nammaqatigiinnerunngilaq, nangippoq.
Qaqugumitaava kingunera innuttaasut takusinnaalissavaat?
- Apeqquterujorujussuuvoq inatsisartut qanoq isummerumaarnersut. Inatsisartut naalakkersuisunik sulisitsisuupput, inatsisartullu amerlanerussuteqartut isuma tapersersorpassuk tassa inatsit taanna akuersissutigineqassaaq, Godmand Rasmussen oqarpoq. Naalakkersuisut angallannermut allannguutissamik siunnersuuteqarnissaat aamma pissangalluni utaqqissanerarpai, aningaasallu imaatigut angallassinermi pisariaqartinneqartussat arlaatigut nassaarineqassaqqaartut oqaatigalugu.
