GME-p kinamiut aatsitassarsioqatigiiffissuat isumaqatigiissuteqarfigaa
Suliffeqarfissuaq China Non-Ferrous Metal Mining Group, Kinamiut suliffeqarfissuannit NFC-mit pigineqartoq, nunani 80-init amerlanerusuni suliaqarpoq nunarsuarmi suliffeqarfiit annerit 500-t ilaanniilluni. Berlingske Business taama allaaserisaqarpoq.
Narsap eqqaani Kuannersuarni uranimik saffiugassanillu qaqutigoortunik piiaanissaq taamaasilluni ilusinikkiartulerpoq.
Suleqatigiinnissamik isumaqatigiissut, qanoq pilersaarnermik nalunaarutaannaagallartoq, sapaatit-akunnerata siuliani atsioqatigiissutigineqarpoq.
Kuannersuarni suliniutip saffiugassanik qaqutigoortunik nunarsuarmi niuerfimmi pisariaqartitsinerup 25 procentiata missaa kinguaariinni arlalinni naammassisinnaavaa, GME taama isumaqarpoq.
Kinamiut suliffeqarfissuata NFC-p suliassarissavaa saffiugassat qaqutigoortut Kinami immikkoortiterivittaassami immikkoortitertarnissaat. GME-llu neriuutigaa Kinamiut piiaavimmut siunissami aamma aningaasalersueqataasinnaalissasut.
- Urani saffiugassanut qaqutigoortunut ilanngullugu piiarneqartussaq suliffissuaqarnermit soqutigineqartupilussuuvoq, GME-mi qullersaq, Roderick Mclllre, Berlingske Businesimut oqarpoq.
- Uranimik tigooraanissaq pillugu ukiup affaata tulliup iluani isumaqatigiissuteqarnissarput naatsorsuutigaara. Europami, amerikami avannarlermi koreamilu kujallermi suleqatigisinnaasatsinnik maanna oqaloqateqarpugut, qullersaq taama oqarpoq.