GM-imi unammeqataasut assortuuttut
![](/sites/default/files/styles/image_934x467/public/oembed_thumbnails/2022-12/2e1UVH3YGewBeaVcfNMDXvq6cRnnsE2yrmDEaLZRwbU.jpg?itok=bcPsR9nq)
G-44-p Siuterullu marlunngormat unamminerat målimik ataasiinnarmik inerneqarpoq. Målernerlu taanna kingorna Facebookimi assortuussutaangaatsiarpoq. Unammineq naammassimmat aamma Siuterormiut akeqqatik ajugaasut dommerillu assammikkumanagit arsaaffimmit aniinnarput.
Siuterormiut illersuisuisa arlallit G-44-p fair-play-imik malitassamik atuinnginnerarlugit Facebookimi isornartorsiorpaat. Tassalu timersortartorpalaartumik iliorluni arsap akeqqamut tunniunnissaanik ileqqorineqartoq. Facebookimi oqallinneq sakkortusiartuinnartoq GBU-p Facebookimi oqallittarfimmini kingorna ima qisuariaateqarfigaa:
- Kissaatiginarpoq arsaattartut, sungiusaasut, dommerit, aaqqissuisut allallu arsaannermut attuumassutillit ileqqorissaarnissaat, tassani aamma ilaalluni arsartartoqatinik, dommerinik allanilluunniit arsaannermut attuumassutilinnik Facebook-ikkut allatigulluunniit akerartuutinik nikassaatinillu nittarsaassisoqannginnissaa. Taamatut pissusilersorneq atorsinnaanngilaq akueriuminaallunilu, GBU taama allappoq.
Assortuussutaasoq unamminerup immikkoortuani siullermi minutsit 35-ngajaat ingerlareersut pivoq. G-44-miu pakkerneqarnermi kingorna anniarluni arsaaffimmi nalaannarpoq, soorlu qulaani videop aallartiffiani takuneqarsinnaasoq.
Dommerip unammineq unitsippaa. Arsartorlu nikuereermat arsaq Siuterormiut måliata tungaanut G-44-p ingerlappaa, Siuterormiulli uninngaannarpasipput, tamannalu G-44-miut atorluarlugu arsaq ingerlappaat målernermillu unamminerup inernerisaanik kinguneqarpoq.
Unamminermi oqaluttuusut pisoq ima nassuiarpaat:
- G-44-miut ilaat anniarmat dommeri siggarami unammineq unitsillugu, taavalu Siuterormiut isumaqarunaramik timersortartorpalaartumik G-44-miut arsaq Siuterormiunut uterteqqissagaat, kisianni G-44-miut paariinnaramikku taamaalillutillu Siuterormiut uninngaannapajaarlutik utaqqerujoortut isertippaat.
- Soorluuna aamma naammagittaalliutigissallugu Siuterormiut bænkianinngaanniit eqqartorneqartoq, unamminermi oqaluttuusut taama oqarput.
![](/sites/default/files/styles/image_934x467/public/2016.08.12_01076_007.png?itok=4gGHS8vz)
GM-imi semifinalit ullumi tallimanngornermi ingerlanneqassapput. Nalunaaqutaq 16.00 N48 aamma G44 unammissapput, nalunaaqutaq 19.00-ilu IT79 aamma B67 unammissallutik. Unamminerit KNR1-kkut isiginnaarneqarsinnaapput. Pissartanngorniutivinneq sapaatiuppat pissaaq.