GM-ertut kullorsorniassamaalerput
![](/sites/default/files/styles/image_934x467/public/article_images/ilulissat_marts_2012_630_0.jpg?itok=5jIKWYXZ)
Kugsak-45'p GM-qataanera maanna ullunik arfineq pingasunik sivisussuseqareerpoq sulili nalunarpoq qaqugu Qasigiannguanut apuutissanersut.
Arsaattartut Qasigiannguaniit nunaqarfimmut Ilimanamut qamuteralannik ingerlariarlutik Ilulissat kujatinnguanni Sermermiunut angallammik ikaarput Ilulissat saavat sikumik assersimammat. Tamatuma kingorna sikuunera allanngorsimanngilaq maannalun Kugsak-45-meersut Ilimanamut ikaarniarnertik ajornartorsiutigilerpaat. Pilersaarutaagaluarpoq ikaariarunik qamuteralannik aaneqarnissaat.
- VHF radiora maanna atukkiutissavara. Taava Sermermiut Ilimanallu akornanni imartamiittut angallatit attaveqarfigeriassavaat paasiniarlugu arlaat Ilimanamut ikaassisinnaanersoq, Bent Petersen aaqqissuisut I-69-meersut sinnerlugit KNR-imut oqarpoq.
Kugsak-45-meersut GM-imut peqataanissartik piffissaq kingulleq qulakkeerpaat tamannalu pissutigalugu ilisimaaralugu taamatut angalaniarneq pisariusinnaasoq.
- Arlagut maanna suliartoreersimasussaagaluarput. Neriuppugulli Kangiata sullua ullumi ikaarsinnaassallugu, Nukaaraq Lyberth Kugsak-45-meersoq KNR-imut oqarpoq.
Ilulissani pissartanngorniuttoqarnerani Kugsak-45 normu 9-tut inissippoq, I-69 Ilulissaneersoq pissartanngortoq.