Pituffik aamma puisit amiinik EU-mut eqqusseqqusiunnaarneq Folketingimi sammineqarput

Folketingimi Pituffik eqqartorneqaqqippoq. Ilaatigut Inatsisartut isumaqatigiittut sisamanngormat ministeriunermut oqaaseqaateqarmata kajumissaaralutik, USA-mik illersornissamut isumaqatigiissutip misissoqqinneqarnissaanut, siunertaralugu Kalaallit Nunaata soqutigisai naammattumik isumagineqarsimanngippata isumaqatigiinniutigineqaqqissinnaanerat.

- Ministeriunerup Inatsisartut isumaqatigai, illugiilluni Kalaallit Nunaata Danmarkillu USA-mut illersornissaq pillugu isumaqatigiissutaata isumaqatigiinniutigineqaqqinnissaanut? Johan Lund Olsen ministeriunermut aperivoq, imalu akineqarluni:

- Pituffik pillugu aperisup ilisimavaa suliaq Kalaallit Nunaannut Danmarkimullu pingaaruteqarluinnartoq. Naalakkersuisullu ersarissumik isumaqarput, avaqqutaarilaarneq Kalaallit Nunaannut iluaqutaasinnaasoq. Uagullu aqqutaa tamaat taama isumaqarpugut. Ministeriuneq akivoq nangillunilu:

- Paasivara nunanut allanut tunngasunut ministeri nalunaaruteqarmat, isumaqatigiinniarnerit maanna ajunngitsumik ingerlasut. Tassani aamma isumaqarpunga, qanittumik suleqatigiinniarsimasugut isumaqatigiinniarnerit ajunngitsumik ingerlanissaannut.

Ministeriuneq Helle Thorning-Schmidt oqarpoq.

Johan Lund Olsenip apeqqutaata aappaa sammitinneqarpoq ministeriunerup EU-p puisit amiinik tunisassiat pillugit sukanganerusumik aalajangiiniarnera pillugu oqaloqatiginnittarneranut - siunnersuut ukioru oktobarimi EU-Parlamentimi aalajangiiffigineqartussaq. Tassunga ministeriuneq ima akivoq:

- EU-mut erseqqissaatigisimavarput, suliaq suliareqqullugu paatsoorutaasinnaasut tamaasa piiarlugit. Tassa puisit amiinik tunisassiat pillugit ajunnginnerusumik paasititsiniaaqqullugit EU'p puisip amiinik eqqusseqqunnginneranut sammisumik. Kalaallimmi puisinniartarnerat eqqugaanerlussimaqaaq. Taamaattumik suleqatigiilluta paatsoornerit piiarniarsaraavut, EU-mullu puisip amii pillugit nutaamik peqqussusioqqusilluta.

Ministeriuneq Helle Thorning-Schmidt taama oqarpoq.

Folketingimut ilaasortap aappaa, Doris Jakobsen Siumut, apeqqarissaartoqarnerani najuutinngilaq, Kujataani angalangami urani pillugu Narsami ataatsimiisitsiartorluni.