VIDEO Arctic Winter Games nammineq piumassutsiminnik suleqataarusuttunik amigaateqarpoq

Nammineq kajumissutsiminnik sulisussat eqimattakkuutaat 60-it, unammiuaartoqarnissaanni sulisorineqartussat, piareersimalerput, aappaagu marsip ulluisa arfernanni aallartittussamut piariilerlutik.

- Amerlanerusunilli pisariaqartitsivugut, aaqqissuussinerup aallartinnissaanut suli pisariaqartitsilluta. Taakku pissarsiariumaarpavut, ilaatigut ilinniartunut saaffiginnissuteqarniarluta, suliffeqarfinnullu aamma attaveqassamaarluta. Soqutiginnittullu maannamut imaaginnavissimapput, Arnakkuluk Jo Kleist, Arctic Winter Gamesertoqarnissaannut atatillugu nammineq kajumissutsiminnik sulisussanut akisussaaqataasoq oqarpoq.

Aamma atuaruk Arctic Winter Games frimærkisinikkut tapersersoruk

Nammineq kajumissutsiminnik sulisorineqartussat isumagisassaat amerlaqaat assigiinngitsorujussuullutillu, tassami inuit 2000-it missaat AWG 2016-iliarlutik Nuummukassapput.

- Nerisaqartussaapput, pisussanut sumiiffissanullu tunngasunik nassuiaanneqassapput, allatigullu sullinneqassallutik. Unammiuaartoqartussaavorlumi aamma. Taakku aaqqissuussaanikkut aamma unammillernartoqassapput, AWG 2016-imik aaqqissueqataasoq oqarpoq.

Artcic Winter Gamesertoqarnerani nammineq kajumissutsimik suliniaraanni immikkut ilinniarsimasuunissaq piumasaqaataanngilaq. Tuluttulli oqalussinnaanissaq soorunami pingaaruteqarpoq, iluaqutaassagunarlunilu.

- Suliassanik agguaassiumaarpugut, kikkullu tamarmik atorfissaqartippavut, Arnakkuluk Jo Kleist erseqqissaavoq.