Arctic Winter Games frimærkisinikkut tapersersoruk
Nunatta oqaluttuarisaanerani timersornikkut aaqqissuussinerit annersariligassaata aallartinnissaannut AWG-p nittartagaani nalunaaqutaq ullunik, minutsinik sekundinillu kisitsisoq taama takutitsivoq.
Post Greenlandilu AWG tapersersorlugu frimærkip nalinganut tapiliussamik ullumi saqqummiussaqassaaq.
Frimærkip assiliartaraa Arctic Winter Gamesip ilisarnaataa 11 koruuninillu + 1 koruunimik naleqarpoq, 1 koruunimillu tapiliussaq taanna timersornikkut aaqqiissuussinissarsuarmut tapersiutitut atorneqassaaq.
Frimærki kulturikkut illorsuarmi Katuami ullumi nalunaaqutaq 13.00 nalliuttorsiorpaluttumik katerisimaarnermi saqqummiunneqassaaq, allakkanillu nassiussinermi frimærkip taanna atorluaqqunarpoq, Arctic Winter Games ullut 412-it qaangiuppata aallartippat aningaasat atorluarneqassammata.