Savalimmiuni qinersisoqassasoq savalimmiormiut lagmandiat suaaruteqarpoq
Savalimmiuni inatsisartunut decembarip ulluisa arfineq-pingajuanni qinersisoqarnissaa nalunaarutigineqarpoq.
Savalimmiuni naalakkersuisut siulittaasuat Bárður á Steig Nielsen Savalimmini inatsisartut oqaluttarfiannit taama ilisimatitsivoq.
Savalimmiormiut nunanut allanut tunngasunut naalakkersuisuata Jenis av Ranap marlunngornermi soraarsitaanerata kingorna Bárður á Steig Nielsen amerlanerussuteqarunnaarpoq.
Jenis av Ranap partiiata kristumiussusermik pingaartitsisup Miðflokkurinip, siulittaasumi soraarsitaanerata kingorna naalakkersuisut siulittaasuata naalakkersuisoqatigiivinut tapersersuiunnaarpoq.
Folketingimut qinersisoqarnissaanut atatillugu qineqqusaarnermi Jenis av Rana ilaatigut oqarpoq Danmarkimi partiip De Konservative Folkepartip siulittaasua Søren Pape Poulsen suiaqatiminoortuummat ministeriunertut toqqarsinnaanagu.
Jenis av Rana suiaqatiminoortut akerleralugit siornatigut oqaaseqartarsimavoq, Savalimmiunilu naalakkersuisut siulittaasuata ingasannerarlugu Jenis av Rana naalakkersuisutut marlunngornermi soraarsillugu.
Jenis av Rana pillugu sapinngisani tamaat sungiussiasuuniarlunlu akunnaallisaarillaqqinniarsarisimanini Steig Nielsenip tusagassiutinut nalunaarummi marlunngornermi oqaatigaa.
- Nunanulli allanut tunngasunut naalakkersuisup tunngaviusumik pissusilersuutit piffissami sivitsortumi unioqqutittarsimagai inerniliuppara, Steig Nielsen ilaatigut oqarpoq.
