Nunanut allanut unammisartut piareerput

Nunanut allanut unammisartunut sungiusaasup, Johannes Grothip, Nunarput sinnerlugu NORCA-mi Puerto Ricomi pissartanngorniuteqataasussat arnat 16-nit toqqarpai. Pissartanngorniuunneq taanna pingaaruteqarpoq, tassami angusarinnerit pingasut Panamerikami pissartanngorniuunnernut Canadami aasaru pisussamut anngutissapput. 

Mexico NORCA-mi peqataaniarani nalunaarsimavoq, Kalaallillu periarfissaat minnerulinngillat. Taamaammat sungiusaasoq isumalluarpoq. 

- Danmarkimi katersuunnitsinni sungiusarnermi unamminermilu takusakka tunngavigalugit isumaqarpunga Purto Ricomi angusaqarluarnissarput piviusorsiortuusoq, Johannes Groth tusagassiuutinut oqarpoq. 

- Arsartugut piareersimapput ajoquseqqasoqaranilu. Ukiut kingulliit ingerlanerini unammisartut siuariarnikuupput, maannalu Nunatsinni assammik arsaattartut susinnaanersut takutittussanngorparput. Nuannissaqaaq, Johannes Groth oqarpoq. 

Unammisartut aqutsisuata Najaaja Anja Lyberthip, ulluinnarni GSS-imi unammisartup, Mexicop peqataalinnginnera ajuusaarutigaa. Taamaattorli unammiarnissamut qilanaarpoq.

Unammisassagut siornatigut ajugaaffigalugillu ajorsarfiginikuuagut, taamaammat unamminissaannut qilanaarpugut.

Immaqa tupaallatsitsilluta pissartanngorsinnaavugut, Najaaja Anja Lyberth oqarpoq. 

Nunanut allanut unammisartut arnartai martsip 26-ani Puerto Ricoliassapput. Martsip 30-anit apriilip pingajuanut pissartanngorniuuttoqassaaq. 

USA, Puerto Rico aamma Den Dominikanske Republik unammeqataassapput. 

Nunanut allanut unammisussatut toqqarneqartut ukuupput:

Måliniittut:
Nivi Fly, GSS
Aviaaja Heilmann, GSS
Arsartut:
Andrea Andreassen, GSS
Ulla Kleist, GSS
Sara Biilman Egede, Ajax
Anja Heilmann, GSS
Lykke F. Hansen, GSS
Christina V. Lange, NuK
Anja Salsø, Ajax
Najaaja A. Lyberth, GSS
Kathrine Mikkelsen, Silkeborg Voel
Panu P. Grønvold, GSS
Mie Egede Rasmussen, Virum Sorgenfri
Arnannguaq Steenholdt, GSS
Nivi H. Efraimsen, SAK
Nivi Berthelsen, GSS