GG: -Kanngusuutissaqarata tulluusimaarpugut
Canadami amersisarsimanernut atatillugu uparuaanerit Kalaallit Nunaata ammeriviata naalakkersuisunut qaammat naatinnagu nassuiaateqarfigissavai.
Taakkuli ernummatissaqannginnerarput, sulineq tamarmi niuernerpalaartuusoq unnerlugu.
Canadamit pisisarsimanertik kanngusuutigineraa ammeriviup pisortaanut Michael Nielsenimut apeqqutigaarput.
- Naamerluinnaq tulluusimaarutigeqaara. Tassami amernik Canadameersunik pisisariaqalersimavugut Kalaallit Nunaanni tunisat 106.000-iniit 61.500-nut ikileriarmata. Taamaaliortariaqarsimavugut Qaqortumi sulineq aamma ingerlaannarsinnaaqqullugu, Nielsen oqarpoq, nangillunilu.
- Avammut niuernermi tunisassiaqartuaannarnissarput minnerunngitsumillu puisit amiinik pilersorneqarnissarput aalajangiisuunerpaasimapput, kikkunnit pisarineqarnerat apeqqutaatinnagu, erseqqissaavoq.
Amernik Canadameersunik Ammeriviup pisiortornini unitsereeraa, Naalakkersuisut Ammerivimmik piginnittutut Canadamit pisiortorneq unitseqqoriarlugu kingorna Canadap ilaanit Nunavut-mit pisisinnaaneq akueraat.
Ammerivimmi pisortap ammit Canadameersut amigartoorutaanngisaannarnerarpai.
- Soorunami Canadameersut suliareqqaaleratsigit ajornartorsiuteqaqqaalaarpugut, kikkummi suliamik nutaamik aallartitsisut taamaanngimmata. 2005-ip qeqqanili ajornartorsiut qaangerparput, taamanerniillu Qaqortumit tunisassiat Kangiani tunisaaneri sinneqartoorfiujualersimapput, Michael Nielsen erseqqissaavoq.
Ammit nunatsinneersut Canadameersullu Danmarkimi Glostrup-imi ammeriviup immikkoortortaanit tuniniarneqartarput.
Erinarsortartoq tusaamasaq Paul McCartney nuliilu puisinik illersuillutik nunarsuarmiunut qanittukkut nittarsaapput, ammerivimmulli tamanna sunniuteqangaassanngitsoq, Ammeriviup pisortaa Michael Nielsen eqqoriaavoq, oqarluni Brigitte Bardot-p Paul McCartney-llu isumaat Kangiani pisisartumik soqutiginngilluinnaraat.
