GEUS erseqqissaavoq: Camp Century sermersuup iluaniiginnarallarniarpasippoq
Amerikamiut nunatta sermersuani sakkutooqarfitsik 1967-imi qimappaat.
Sakkutooqarfikoq taanna sermersuup iluaniiginnassanersoq sermersuulluunniit silap pissusiata allanngoriartupiloornerata ilutigisaanik aakkiartornerani nuissanersoq tamatuma kingorna apeqqutigineqarluni oqallisaasarpoq.
Danskit naalakkersuisui Naalakkersuisullu Camp Century Climate Monitoring Programme ukiut sisamangajaat matuma siorna, tassa 2017-imi pilersippaat.
Suliniut taanna GEUS-ip siulersorpaa, ilisimatuullu Camp Centurymi silasiortuullutillu apummik misissuisarput taavalu radarimik misissuisarput.
Tusarfik: GEUS
Sakkutooqarfikumili tassani qimatat sermersuup iluaniiginnarallarniarpasittut sermersuarmiillu sakkutooqarfikumut kooqalernavianngikkallartoq, ilisimatusarnermi erseqqissarneqarpoq.
Ilisimatusarnermi aqutsisoq, Danmarkimi Kalaallit Nunaannilu nunap qanoq issusianik misissuiffik, GEUS, tusagassiuutinut taama ilisimatitsivoq.
Sermersuaq aakkiartornerminit apilertornerujuaannassasoq
Sermersuarmi ukiuni kingullerni apisarneranik silallu qanoq inneranik ilisimatusarnermi nalunaarsukkat paasisallu ilisimatuut najoqqutaraat.
Tassa imaappoq, silap pissusiata ukiup 2100-p, tassa Naalagaaffiit Peqatigiit silap pissusia pillugu ataatsimiittartoqatigiivisa silap qanoq ittarumaarnissaanut siulittuinerminni killifiata tungaanut naatsorsorpaat.
AAMMA ATUARUK Camp Centuryip radarinik misissuiffigineqarnera GEUS-ip saqqummiukkaa
Sakkutooqarfikup Camp Centuryp qaava aasakkut aapiloortarumaaraluarluni apeqqittuartarumaartoq, ilisimatuut misissuinerminni paasisatik tunngavigalugit naliliipput.
GEUS-imi suliniuteqarnermi aqutsisoq ilisimatusartuunerlu, William Colgan, taama erseqqissaavoq.
- Sermersuaq aakkiartortuarsinnaraluartoq ukiumut apinerujuaannartassammat sakkutooqarfikoq morsukkiartuinnarluni sermersuup iluaniiginnarallarniarpasippoq.
- Tassalu sakkutooqarfikup sermersuup aakkiartornerata ilutigisaanik ukioq 2100 nallertinnagu nuinissaa ilimananngilaq, William Colgan tusagassiuutinut allappoq.
Sermersuup iluani sakkutooqarfikoq nikingaatsiarsimasoq, radarimik siusinnerusukkut misissuinermi erserpoq.
Ilisimatuulli sakkutooqarfikup eqqaani silasiorfimmi uuttortaanerit uppernarsaanerminni najoqqutaraat.
- Sermersuarli siornatigut uuttortaanerit naapertorlugit naatsorsuutigisamit aakkiartupilooranilu issinnerusoq uuttortaanerni nutaani erserpoq, GEUS allappoq.
Sakkutooqarfikoq sermersuarmi 32 meteritut ititigisumiittoq
Sakkutooqarfikoq naggataatigut puttuttussanngorlugu sermersuaq aakkiartornersoq allanngoriartornersorluunniit apeqqutaavoq ataaseq. Aammali ilisimatuunut apeqqutaavoq, sermip kuui qimatanut kuussanersut tamatumalu ernganut minguttumut akuiliullutik.
AAMMA ATUARUK Atomimik nukissiorfikumi ulorianartumik qinngualasoqanngilaq
Sermerli meterimik ititigiinnartumik 2000-kkut naaneranni kooqartarumaartoq, misissuinermi nutaami erserpoq.
- Tassa imaappoq, sakktuooqarfikoq radarimik misissuinermi paasisat naapertorlugit sermersuarmi 32 meteritut ititigisumiimmat tassani imerpalasut akuleruteratarnissaat ilimananngeqaaq, GEUS allappoq.
