Gerhardt Petersen: Siulersuisuni taarsiisoqassaaq

Nunatsinni suliffeqarfissuit annerpaat ilaat Namminersornerullutik Oqartussat pigisaat, KNI A/S, ukiup affaani siullermi 74 million koruunit missaanni amigartooruteqareersorlu, immikkut ittumik ataatsimeersuartinneqartussanngorpoq, tassanilu oqaluuserisassaq pingaarneq tassaavoq, siulersuisuni ilaasortat ilaasa nutaanik taarserneqarnissaat. KNI-p pisortaanerata Gerhardt Petersenip tamanna uppernarsarpaa:

- Sapaatip akunnerani kingullermi qaaqquneqarpugut. Tamannalu ajunngitsumik tiguara, tassa qaqugukkulluunnit ataatsimeersuartoqarnissaanik piginnittut kissaateqarsinnaatitaammata.

Siulersuisuni ilaasortat ilaasa nutaanik taarserneqarnissaat pingaarnertut oqaluuserineqasssasoq, Gerhardt Petersen oqarpoq.

Naalakkersuisut siulittaasuat, Hans Enoksen, oqarpoq, kisitsisilerillaqqissunik aqutsillaqqissunillu KNI siulersuisoqartariaqartoq. Gerhardt Petersen aperaarput kikkut kisitsilluarsimanatillu aqutsilluarsimannginnersut. Akivoq isumaqarluni, siulersuisut ajunngitsumik ingerlatsisimasut.

- Suut amigartoorutaasimanersut isumaqarpunga isiginiarneqartariaqartut immikkoortinneqartariaqarlutillu. Tamaattorli Naalakkersuisut siulittaasuata oqaaasi ajunngitsumik tigugini Gerhardt Petersen oqarpoq.

- Tassani isummat nutaat siulersuisut nutaat suleqatiginissaannut qilnaarpunga.

KNI-mi siulersuisut ilaannik taarsiinissamut atatillugu pisortaanerup erseqqissaatigaa, KNI-mi sulisut ukiut sisamakkaarlugit sinniisissamittut siulersuisuni toqqagaat taarserneqarsinnaanngitsut.

KNI-p amigartooruteqarneranut suliffeqarfissuarmik ingerlatsisut siulersuisullu akisussaanerat Gerhardt Petersenip erseqqissaatigaa.

Naalakkersuisut tusagassiuutinut nalunaaruteqarlutik allapput KNI-p siulersuisuini siulittaasup Simon Olsenip sulinera iluarisimaarneqarmat siunissamilu sulilluarnissaa naatsorsuutigineqarmat taarserneqarnavianngitsoq.

Vagn Andersen, Arctic Umiaq Linemik iluarsartuussisimasoq, AG-mut oqarpoq, siulersuisuni ilaasortassatut toqqarneqarsimalluni. KNI-mi siulersuisuni ilaasortat tunuartinneqartussanngortut marluk ataatsinngorpat ualikkut ilisimatinneqassasut, AG-mi allaaserineqarpoq.

KNI A/S Nuummi Decembarip ulluisa sisamaanni immikkut ittumik ataatsimeersuassaaq.