Gerhardt Petersen Atassummi siulittaasunngorpoq
Taanna juunip aappaanni Inatsisartunut qinersinermi Inatsisartunut ilaasortanngornissaminut qinersisunik amerlanngitsunik taamaallaat amigaateqarpoq. Maannalu partiip Inatsisartunut ilaasortaatitaannut pingasuusunut sinniisussatut siullertut inissisimavoq.
Gerhardt Petersen taasisinnaallutik ataatsimeersuaqataasunit 25-usunit 15-init qinerneqarluni siulittaasunngorpoq.
Atassummi siuttunngortut allat tassaapput Steen Lynge, Nuummeersoq, naalakkersuinikkut siulittaasup tulliatut qinerneqartoq aamma Jens Peter Mølgaard Qeqertarsuarmeersoq, aaqqissuussaanikkut siulittaasumut tullinngortoq. Ove Thomassen Nuummeersoq allatsitut qinigaavoq.
Siulersuisuni ilaasortanngortut allat tassaapput Godmand Rasmussen, Sisimiuneersoq, aamma Samuel Mørch Upernavimmeersoq kiisalu Arnannguaq Blytmann Aasianneersoq.
Sinniisussatut qinigaasut tassaapput Ulrik Mathiassen Paamiuneersoq aamma Marie Mølgaard Qeqertarsuarmeersoq.
Atassutip Inatsisartuni ilaasortaatitai pingasuusut - Finn Karlsen , Siverth K. Heilmann aamma Knud Kristiansen ataatsimeersuarnermi peqataanngillat. Knud Kristiansenillu siulittaasutut qinigassanngortikkaluarnini piffissaq kingulleq atorlugu tunuartippaa.
Radioaviisimit siulittaasunngorlaamut Gerhardt Petersenimut apeqqutigalugu paaserusukkaluaratsigu kikkut partiimi pissaanermik tigumiaqalernersut. Tassa paaserusullugu tassaanersut partiip qinigaatitai, imaluunniit partiimi siulersuisunngortut, partiimili siulittaasunngorlaaq arlaleriarlugu atassuteqarfiginiartaraluaratsigu iluatsinngitsoorparput.
