Georgiami qinersisoqarmat præsidentiusoq ajugaavoq
Nunami siornatigut Sovjetunionimut ilaasimasumi Georgiami Inatsisartunut qinersisoqaqqammerpoq, tassanilu præsidentiusoq Mikheil Saakashvili ajugaasutut unnuaq imminut suaarutigivoq, illuatungiliuttulli oqaatigaat, qinersinermi peqquserluttoqarsimasoq.
Allattoq Louise M. Kleemann
maajip 22-at 2008 06:40
Qinersinermi inernerugallartut ullaarmanna ersersippaat, Saakashvilip partiiata qinersisut 61 procentii pissarsiarisimagai, nutaarsiassaqartitsivik AP taama nalunaarpoq.
Nunat killiit qinersineq Saakashvilip demokratiimik qanoq ataqqinnitsigineranut misiliutitut isigaat. Taassumami Georgiap NATO-mut ilaasortanngornissaa anguniagarimmagu.
- Pingasunngornermi qinersineq ”kiffaanngissuseqarluni naapertuilluartumillu ingerlanneqarpoq, tamannalu qinersinermik nakkutilliisut nunanit tamaneersut uppernarsarsinnaassagaat neriuutigaara. Taamaattorli partiip naalakkersuisuutitaqartup ajugaarujussuarnera tupaallannarnerpaavoq, Saakashvili oqarpoq.
