George Bush ilungersunartorsiorpoq
USA-p præsidentia George Bush gassinik silaannarmik kiannerulersitsisunik aniatitsineq pillugu ilungersunartorsiorpoq, USA-mi eqqartuussiviit qullersaata ippassaq aalajangiinermini, amerikamiut naalakkersuisui mingutsitsinerup killilersimaarnissaanut iliuuseqanngippallaarnerarlugit avoqqaarereeraalu.
Eqqartuussinerup inernera George Buship annilaarutigaa.
- Tamanna misissorluartariaqarparput, taannami inatsit nutaajuvoq, Bush ippassaq oqarpoq:
Bush isumaqarpoq, Amerikami eqqartuussiviit qullersaata Amerikami naalagaaffiit nukissiorfitsigut iliuusaat paatsiveerutsikkai, oqarlunilu, eqqartuussiviup aalajangiinera misissorluartariaqassagitsik.
Amerikami eqqartuussiviit qullersaata aalajangerpaa – IPI, tassa amerikamiut nukissiornikkut isumaginnittoqarfiat, pisinnaatitaaffeqaannarani pisussaaffeqartoq, silaannaap allanngornerinut amerikamiut illersussallugit, tassa gassinut silaannarmik kissakkiartortitsisunut iliuuseqarnissamut pisussaaffeqartut. Tamanna USA-mi pissutsinut allanngortitsissaaq, nukissiuutinimmi nakkutilliisut manna tikillugu oqartuartaraluarput, gassinik kissakkiartortitsisunik killilersuinissamut unitsitsinissamulluunniit pisinnaatitaaffeqaratik.
Maannali avatangiisit pillugit sakkortunerusunik USA-mi malitassaqalissaaq.
Tamanna suliniaqatigiiffinnut, naalagaaffinnut politikerinullu avatangiisit pillugit sakkortunerusunik inatsisiliorusuttunut ajugaaneruvoq.
Qularnanngilarlu USA-mi naalagaaffiit ilaat avatangiisit pillugit sakkortunerusumik iliuuseqarnialissasut, pingaartumik biilit nukissiorfiillu gassimik kissakkiartortitsisumik aniatitsinerat pillugu. Taakkumi mingutsitsinerpaammata. Aamma qularutissaanngilaq, USA-mi inatsisartuni Demokratit apeqqut pillugu iliuuseqarnialissasut, tassami ukiup ataatsip kingulliup ingerlanerani silaannaap allanngoriartornera, gassinik silaannarmik kiatsikkiartortitsisunik aniatitsineq assigisaalu oqallisigerusuttaqimmatigik, eqqartuussiviit qullersaata aalajangiinerata kingorna suliassaqarlualernissaat maanna ilimagineqarsinnaammat.
