Georg Stagemik angalaqataagit
Georg Stage siulleq 1884-imi sananeqarpoq, kingornalu umiarsuaq ilinniarfiusoq Georg Stagemik atilik nunarsuup imartaani angalasimavoq. Georg Stage maanna atuuttoq Frederikshavnimi 1934-mi sananeqarpoq. Ukiormanna ilaatigut Shetlandip qeqertaanut Savalimmiunullu angalasussaavoq, aamma ilinniartut Tall Ship Racemut peqataanissaq misigisaqarfigisinnaavaat, tassanilu Georg Stage inuttanilu Norgemut, Estlandimut Polenimullu angalassapput.
- Georg Stagemut ilaaneq imarsiornermik ilinniarfimmi ilinniarnermut assinguvoq. Ilinniarnerup naammassineratigut imarsiornerup iluani sulilernissamut periarfissanut ammaassisoqartarput. Atuarfimmi piginnaasat naapertorlugit, kingornatigut umiartortutut misilittagartuutut, umiarsuarmi aqumiutut maskinmesteritulluunniit ilinniartoqarsinnaavoq. Georg Stagemi angalaqataanikkut umiarsuarmik ingerlatsinissamut, ikuallattoornissamik akiuiniarnermut, radiolerinermut motoorilerinermullu tunngaviusumik piginnaasassat ilinniarneqartarput, Tage Ebbensgaard, Kommandør G. de Lichtenbergip Aningaasaateqarfiani siulittaasuusoq oqaluttuarpoq. Georg Stagemut ilaallutik ilinniarnissaminnut periarfissinneqartut 70-it akornanni kalaallit arfinillit peqataanissaat aningaasaateqarfimmit ukiut tamaasa isumagineqartarpoq.
Ukiut tamaasa inissaqartitatsinnut naleqqiullugu sisamariaammik qinnuteqartoqartarpoq, Kommandør G. de Lichtenbergillu Aningaasaateqarfiani siulersuisut Georg Stagemut ilaallutik ilinniartussanik piukkunnartunik toqqaanissaq anguniarlugu annertuumik suliaqartarput. Oqaatsitigut piginnaasat isiginiarneqartarput, danskit tuluillu oqaasiinik naammaginartumik qaffasissusilimmik atuisinnaaneq iluaqutaasarluni. Aammattaaq matematikkimut piginnaasaqarnissaq pisariaqarpoq, umiarsuarmi ilinniarnermut annertuunik piumasaqaateqarnera pissutigalugu.
- Georg Stagemut angalaqataasut aamma inuttut ineriartorneq annertuupilussuaq migisisarpaat. Ilinniartut apriilimi aallartikkaangamik taqimalaartuusartut angalanerup naammassinerani inuulluaqqusussanngoraangatsigit ilisariuminaattarput. Qaqortumi Ilulissaniluunniit anaanap igaavi Savalimmiunullu anorersuarsiorluni angalaneq imminnut ungasittupilussuupput, ilinniartulli imminnut isumaginissartik allanillu qanittumik suleqateqarnissartik ilinniartarpaat. Umiarsuaq inissaqarpallaanngilaq. Unnukkut siniffinni nivinngakkani siniffigineqartartuni ullukkut atuartitsisoqartarpoq, taamaasillutik Georg Stagemut ilaanerminni imminut ilakkarluartarput, Tage Ebbensgaard knr.gl-imut oqarpoq.
Georg Stage pillugu paasissutissat qinnuteqarnissamullu periarfissat uani atuarneqarsinnaapput: www.georgstage.gl imaluunniit www.georgstage.dk
