Republikanerit senatimi amerlanerussuteqarnertik attatiinnarataagaat
USA-p præsidentiata Donald Trumpip partiia republikanerit sinnerlugit senatimut qinigassanngortittoq, Dan Sullivan, Alaskami senatoritut qinigaaqqippoq.
Republikanerit senatimi taamaalillutik 50-init ikinnerunngitsunik ilaasortaqalissapput, demokratit 48-nik ilaasortaqalissallutik.
Senatimi inissat sinneruttut marluk naalagaaffimmi Georgiami aappaagu januaarip ulluisa tallimaanni aappassaanik qinersisoqarnerani inuttalerneqassapput, republikanerillu amerlanerussuteqarnertik attatiinnassaneraat tassani paasinarsiumaarpoq.
Republikanerit ataatsimik marlunnilluunnit amerlippata præsidentissatut qinigaasumut Joe Bidenimut ajornartorsiutaalersinnaavoq.
AAMMA ATUARUK Amerikamiut amerlanerussuteqartut Bidenip ajugaanera akuersaaraat
Demokratilli marlunnik qinigaatitaqassagunik partiit marluk taakku senatimi naligiilissapput tamarmik 50-inik ilaasortaatitaqalissallutik.
Senatimi taasisoqarnerani naligiittoqaraangat præsidentip tullersortaata taasinera aalajangiisuusarpoq, taamalissappallu demokratit sinnerlugit præsidentip tullersortissaatut qinigaasoq Kamala Harris aalajangiisuusassaaq.
Alaskamilu qinersinermi inerneriugallartut aamma takutippaat, Trump amerlanerussuteqartoq ajugaallunilu. Alaskami qinersisartut sinnerlugit taasisartut pingasuupput.
Taamaakkaluartoq USA-mi qinersinermi inerneriugallartut takutippaat, Biden taasisartunik 279-init ikinnerunngitsunik pissarsisimasoq Trumpilu taasisartunik 217-inik pissarsisimasoq.
Taasisartunik 270-inik amerlanerusunilluunniit pissarsisoq præsidentimut qinersinermi ajugaasarpoq.