Amerikamiut amerlanerussuteqartut Bidenip ajugaanera akuersaaraat

Amerikamiut 3 procentiisa Donald Trump præsidentimut qinersinermi ajugaasutut, 79 procentiisalu Joe Biden ajugaasutut taagaat isumasiuinermi erserpoq.

Allattoq Ritzau

novembarip 11-at 2020 07:57

Nutserisoq Jaaku Lyberth

USA-p præsidentiata Donald Trumpip præsidentimut novemberip ulluisa pingajuanni qinersinermi ajugaanerarluni oqarnera, USA-mi inuppassuarnit upperineqannngilaq.

Amerikamiummi tallimaagaangata taakkunannga sisamat Joe Bidenip ajugaanera akuersaarpaat.

Ipsos/Reutersip isumasiunerani tamanna erserpoq.

Joe Biden ajugaasoq isumasiuinermi apersorneqartut 79 procentii isumaqarput. 13 procentii isumaqarput qinersinermi inernerit suli aalajangerneqanngitsut, 3 procentiilu isumaqarlutik Donald Trump ajugaasoq. Qinersisartut fem procentiisa naluaat kina ajugaanersoq.

AAMMA ATUARUK Joe Biden præsidentissatut qinigaavoq

Republikanerit quliugaangata taakkunannga arfinillit demokratillu tamangajammik Biden ajugaanerarlugu oqarput.

Qinersinermi taasinernik kisitsineq suli naammassineqanngilaq, amerikamili tugassiorfiit arlaqartut Joe Biden ajugaasutut arfininngornermi suaarutigaat, naalagaaffinni naligiiffigikkajuttuni siuaqqanera tunngavigalugu.

Donald Trumpip Joe Bidenip ajugaanera suli akuerinngilaa. Donald Trump ajugaasutut imminut qinersinerup unnuakkuanili suaarutigivoq, qinersinermilu peqquserluttuliortoqarsimammat ajugaasussaasimagaluarnerarluni arlaleriaqalunilu oqarpoq, uppernarsaatinilli saqqummiussaqarani.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.