Geneve-imi isumaqatigiissut maleqquaat
Peqqarniisaarniartartutut pasillugit USA-mit parnaarussimatinneqartut 1000-init amerlanerupput.
450-t missaaniittut Cubami Guantanamomi parnaarussimatinneqarput, sinnerisalu nunani USA-mik suleqatiginnikkusuttuni parnaarussimatinneqarlutik. Danmarks Radio taama allappoq.
USA-p inatsisartuini tusarniaanerni paasissutissat taakku saqqummiunneqarput.
Parnaarussat Geneve-imi isumaqatigiissut malillugu tigummineqartarnissaat USA-mi eqqartuussiviit qullersaat qanittukkut aalajangerpaa.
USA-lli naalakkersuisuinit oqaatigineqarpoq parnaarussat 1000-init amerlanerusunit 500-t Geneve-imi isumaqatigiissut malillugu tigummineqarnavianngitsut. Parnaarussat naalagaaffiup isertortumik paasiniaasartuinit CIA-mit tigummiarneqarput.