Kinguaariit marluk kulturikkut nersornaaserneqartut
Ilinniartitaanermut, Kultureqarnermut Ilageeqarnermullu naalakkersuisoq Ane Lone Bagger nersornaatinik Katuami ullaap tungaani tunniussisuuvoq.
Pele Møller Qullissaneersuuvoq, Vaigatimillu 1950-ikkunnili nipilersortarluni.
Jazz aamma nuannaarivaa, nuusiaararlu jazzimik nipilersornertalik, kalaallisullu taallartalimmik 1990'ikkunni siullersaalluni saqqummersitsilluni.
Kingorna saqqummersitani 17-ini peqataasoq, kultureqarnermut naalakkersuisup Ane Lone Baggerip nersornaasiinermi oqaatigaa, Pele Møllerillu erinniai pillugit ima oqarluni:
- Erinarsuusiaani tusarnersuni asanninneq, ikinngutigiinneq, qungujunnarsinnaasut, nunagisamullu asanninneq pinngortitarsuarlu kusanartoq taallani sammineqartarput, Ane Lone Bagger oqarpoq.
Filmiliortartoq inuusuttoq kajumissaaserneqartoq
Nersornaaserneqartut aappaat Jens Christian Lyberth Lennert Kajumissaammik nersornaaserneqarpoq, kultureqarnermullu naalakkersuisoq ima ilaatigut oqaaseqarluni:
- Ikinngutiminik sunnerneqarnermigut assiliinermik filmiliornermillu soqutiginninnera inuusuttuaraanerani aallarnerneqarsimavoq. Kingusinnerusukkut nammineq filmiliortalerpoq. Naatsumik filmiliorluni suliaa siulleq taaguuteqarpoq ”You killed your dreams”. Naatsumik filmiliaa misigissutsiminut, isumaliuutiminut aamma sinnattuminut tunngatitaa.
Filminik naatsuliaasa ilaat ”Kukiiarneq”-ermik qulequtalik, Europami filminik saqqummersitsiviit annersaanni Berlinalen-imi ukiormanna takutinneqartoq, kultureqarnermut naalakkersuisoq oqarpoq.
Naalakkersuisut Kulturikkut Nersornaat 1982-imi pilersippaat. Nersornaat 50.000 kr-nik aningaasartaqartoq inummut ataatsimut arlalinnulluunniit, peqatigiiffinnut kattuffinnulluunniit eqqumiitsuliornikkut kulturilerinikkulluunniit immikkut suliniuteqarsimasunut tunniunneqartarpoq. Nersornaat ukiut tamaasa Inuiattut Ullorsiornitsinni juunip 21-ani tunniunneqartarpoq.
Naalakkersuisut kajumissaatitut nersornaasiuttagaat 10.000 kr-nik aningaasartaqartoq 2016-mi pilersinneqarpoq. Taannalu inuusuttumut piginnaasalimmut Kulturikkut Nersornaasiisoqarnerani aamma tunniunneqartarpoq.
