GE ernumavoq: Angallatitaarnissamut tapiiginnartoqartalissaaq

Naalakkersuisulli siunnersuuteqarput, tapiiffigineqarlutik aalisariutaatiminnik isaterisitsisut aalisarnermut akuersissutaateqaannarsinnaassasut.

Kisianni taamaaliorneq tapeeriaatsimik nutaamik eqqussinerussaasoq, Sulisitsisut Peqatigiiffiat isumaqarpoq.

- Annilaagassutigisarput unaavoq naleqqussaanani kisiannili tapiissutitut isikkoqalernera inatsisip siunertaanut naapertuutinngitsoq. Tapiiniaraani tapiinertut taallugu assigiinnaraluarpaa uanili aaqqissuusseqqiinermi ilaatinnagu.

Sulisitsisut peqatigiiffiani siunnersorti Bent Sørensen KNR-imut oqarpoq.

Aalisarunnaarniartunut periarfissaavoq

Aalisartoq Utoqqalilluni aalisarunnaarniaruni aalisartoruunniit allamik inuussutissarsiuteqalerusukkuni, aalisariutimi isatertinnissaanut Namminersorlutik Oqartussanit tapiiffigineqarsinnaanissaa, inatsimmi maanna siunertaavoq.

Piumasaqaataavorli aalisartup aalisarnermut akuersissutaa atorunnaassasoq taavalu pisassani utertissagai.

Naalakkersuisulli maanna siunnersuutigaat isaterinissamut tapertikkaluarluni aalisarnermut akuersissut pigiinneqarneqarsinnaalissasoq.

Tamanna inatsisip siunertaanut naapertuutinngitsoq Sulisitsisut peqatigiiffiani siunnersorti isumaqarpoq.

- Taamaammat aalisarsinnaanermut akuersissut pigiinnarluni allanik angallatitaarnissamut isikkoqaliinnarami angallatinik nutaanik pitaarnissaminnut nutaanngitsut taarserlugit tapiissutaasoq, Bent Sørensen oqarpoq.

Aamma atuaruk Enoksen: Aalisartut aalisarsinnaanermut akuersissuteqaannarlik

Inatsisip allannguutitassaa KNAPK-p taperserpaa.

Inassutingaali pisortanit isaterinissamut tapiiffigineqarnissamut, angallataammut tunngatillugu pisortanit attartukkanik tapiissutinilluunniit akiliutisinermit ukiut qulit qaangiunnerani aatsaat pinnani ukiulli tallimaannaat qaangiunneratigut tapiisoqarsinnaalissasoq

Inatsimmut allannguutissatut siunnersuut aqagu marlunngornermi Inatsisartunit siullermeerneqassaaq.