Enoksen: Aalisartut aalisarsinnaanermut akuersissuteqaannarlik
Aalisartut angallatimik isaternissaanut tapiiffigineqartut, aalisarsinnaanermut akuersissutaatitik pisassiissutillu pigiinnartariaqarpaat.
Naalakkersuisut aalisartut angallataannut tapiissutaat akuerissappatigit aalisarsinnaanermut akuersissut pisinnaatitsissutillu nunatta aalisartuisa pigiinnassavaat.
Partii Naleqqap siulittaasua Hans Enoksen taama isumaqarpoq. Siunnersuut Naalakkersuisunit Siumumiillu tapersersorneqartoq Inatsisartuni ullumi oqallisigineqassaaq.
Demokraatit tamatumunnga akerliupput.
Aaqqissuussineq maannakkut atuuttoq naapertorlugu aalisartut angallammik isaternissaanut tapiiffigineqaraangamik aalisarsinnaanermut akuersissutaat atorunnaarsinneqarajuttarput.
Aalisartut inuussutissarsiumminnik tamakkiisumik ingerlatsisinnaajunnaarsimasut ilaatigut aalisaqataajunnaarsinniarlugit tapiissuteqartoqartarpoq.
Aalisartut illersugaassasut
Hans Enoksenili isumaqarpoq taama tapiissuteqarnikkut aalisartut angallamminnik nutarteriniartut sakkortuumik eqqorneqartartut, siunissamilu inuussutissarsiorsinnaanerat eqqugaasarluni.
- Tassa ukua aalisartooreersut soorunami namminneq ukiorpassuarni inuussutissarsiornerat illersugassaavoq aamma ingerlasariaqarpoq. Qanorluunniit aserfallatsaaliitigigaluaraanni pigisaq nutaanngiliartortillugu aserfallakkiartornera sukkanerujussuanngortarpoq aamma imaani aalisariutit taamatut inissisimapput. Aserfallatsaalilluarneqaqaat ilai, kisianni aamma ukiumikkut killissartik tikinnikuuaat amerlasoorpassuit.
Hans Enoksen taama oqarpoq. Taanna isumaqarpoq, aalisartut inuuniarnerminni tunngavimminnik ernumassuteqaratik nutaanik nutaaliaanerusunillu aalisariutitaarnissartik ernummateqaratik pilersaarusiorsinnaasariaqaraat.
Siunnersuut Demokraatinit akerlerineqartoq
Demokraatit Inatsisartuni ilaasortaatitaasa siulittaasuata Michael Rosingip allannguutissatut siunnersuut akerleraa. Taassuma isaterinissamut tapiissutit aalisartut akiligassaqarpallaaratik aalisartuujunnaarnissamut periarfissaattut isigivaa.
- Aalisartummi amerlavallaarpata ikilisarneqarsinnaapput, taamaalillutik pisortanut akiitsoqaratik soraarnerussutisiaqarsinnaassammata. Siunnersuutimmi assigiinnarpaa taxartartup biilia nungullarsimappat, taava nutaamik taxamik pisinissaanut akiliutissavarput. Taama iliorneq isumaqarpugut nammineq pigisamut iliuusissaanngitsoq. Suliffeqarfik kusanartumik ileqqorissaartumillu ingerlatsiguni taava ingerlaannassaaq, ingerlatsinerlukkunilu matusariaqassalluni, Michael Rosing oqarpoq.
