GBU-p akisussaaffik I-69-imiinnerarpaa
GBU-p isikkamik arsaallutik unammisartut ataasiakkaat qimataasut akisussaaffiginnginnerarpai, akisussaaffillu holdit sungiusaasuini aqutsisuinilu innerarlugu
I-69-imi unammiaqataasoq Nuummut ippassaq qimataavoq. Unammersuarnermi ataqatigiissaarisup, Kalaallit Nunaanni Isikkamik Arsaattartut Kattuffiannilu siulersuisuni siulittaasup tulliata Gerth Fleischerip pisoq ilisimasaqarfiginngikkaluarlugu, akisussaaffiup sumiinnera pillugu malittarisassaqarnerarpaa
Tassa una ilisimatitsissutigissuara, timersoqatigiiffiit pissartanngorniunnermut peqataasussatut anngussimasut, angalaniarnernut atatillugu sungiusaasoqarlutillu aamma ataqatigiissaarisoqartarmata, tassa holdledereqartarlutik. Isumaqarpunga tassani holdlederip akisussaaffigingaa qimataasoqannginnissaanik, Gerth Fleischer oqarpoq.
Gerth Fleischerip ilisimanngilaa I-69-imi unammiaqataasoq sooq qimataasimanersoq.
-Takkutinngitsoorsimangaanni angalanissamut tunngatillugu, timersoqatigiiffiup tassani akisussaaffik tigummisariaqarpaa, Gerth Fleischer oqarpoq
Qimataasoq 15-it inorlugit ukiulik, immikkut ittumik akuerisaalluni unammiaqataavoq, akuerisaanissamullu malittarisassaqarpoq.
-Siusinnerusukkut aaqqissuusseqqinnermi aaqqinneqarnikuuvoq. Arnat immikkut akuerineqarsinnaasut, 14-ileereersimasut imaluunnit 16-ileereersimasut timersoqatigiiffiit namminneq isumaqarunik atorsinnaallugu, taavalu aamma saaffiginnissuteqartoqaraangat, soorlu aasaq manna unamminermi aqutsisuni iliuuserinikuuarput, qinnuteqartut angajaqqaavinut akuersiteqqaarlugit unamminermut ilaatillutigit, Gerth Fleischer oqarpoq.
GBU-mi siulersuisuni siulittaasoq Lars Lundblad oqarpoq, kingullermik aqutsisussanik pikkorissaanermi ilaatigut eqqartukkat ilagisimagaat, soorlu unammiartortut aallalernerini takkutinngitsoortoqarpat, aqutsisup aappaa pinngitsoorani uninngaannassasoq.